საპარლამენტო უმრავლესობა პრემიერ-მინისტრის პოსტზე პრეზიდენტ გიორგი მარგველაშვილს საგარეო საქმეთა მინისტრის, გიორგი კვირიკაშვილის კანდიდატურას წარუდგენს.
ამის შესახებ უმრავლესობის სხდომაზე, რომელიც ამ წუთებში, პარლამენტში მიმდინარეობს, უმრავლესობის ლიდერმა, ზვიად კვაჭანტირაძემ განაცხადა.
კვაჭანტირაძის თქმით, უმრავლესობა შეთანხმდა, რომ პრემიერ-მინიტრობის კანდიდატი გიორგი კვირიკაშვილია.
კვაჭანტირაძემ ყოფილ პრემიერ-მინისტრს, ირაკლი ღარიბაშვილს გაწეული სამუშაოსთვის მადლობა გადაუხადა და მას უმრავლესობა რამდენჯერმე ტაშის ფონზე შეხვდა.
უმრავლესობის სხდომა დახურულ რეჟიმში მიმდინარეობს.
მთავრობის უფლებამოსილების შეწყვეტის შემდეგ, საქართველოს პრეზიდენტი შვიდი დღის ვადაში პრემიერ-მინისტრობის კანდიდატად წამოაყენებს საპარლამენტო უმრავლესობის, ხოლო თუ უმრავლესობა შექმნილი არ არის, იმ საპარლამენტო ფრაქციის მიერ წარდგენილ კანდიდატურას, რომელშიც პარლამენტის ყველაზე მეტი წევრია გაერთიანებული.
