საქართველოს პრეზიდენტმა „2015 წელი - ქალთა წელი" შეაჯამა და მარო მაყაშვილი საქართველოსთვის განსაკუთრებული, გამორჩეული გმირობისათვის ქვეყნის უმაღლესი ჯილდოთი, ეროვნული გმირის ორდენით დააჯილდოვა.
დაჯილდოების ცერემონია კოჯორში, იუნკერთა მემორიალთან გაიმართა. საქართველოს პრეზიდენტმა ქვეყნის უმაღლესი ჯილდო მარო მაყაშვილის ოჯახის შთამომავლებს გადასცა.
„ქალთა წლის ფარგლებში, რამდენიმე დღის წინ დავაჯილდოვეთ, სანდრო გირგვლიანის დედა ირინა ენუქიძე. ქალი, რომელმაც თავისი შვილის სიკვდილის შემდეგ რეჟიმის წინააღმდეგ ბრძოლა, ჩვენი შვილების დასაცავად წამოიწყო. ის არის მაგალითი ქართველი დედის, რომელიც არ შემოიფარგლა თავისი კერძო ტკივილით და ტრაგედიით, არამედ მთელ ქვეყანას ემსახურა.
მეორე არის პატარა გოგო, რომელიც წინა საუკუნის ოციან წლებში აი აქ დაიღუპა.
გოგო, რომელსაც ჰქონდა მომავალი ცხოვრების ძალიან ნათელი იმედი. ფიქრობდა ოჯახზე, ფიქრობდა ევროპაში სწავლაზე, ფიქრობდა თავის როლზე საზოგადოებაში.მაგრამ აღმოჩნდა, რომ ერთი ყველაზე მნიშვნელოვანი ღირებულების - საქართველოს თავისუფლების, დათმობის ფონზე არაფერი ეს შესაძლებელი აღარ იქნებოდა.
მარო მაყაშვილი, რომელიც 19 წლის ასაკში აქ დაიღუპა, იმ ახალგაზრდა იუნკერებთან ერთად, რომლებიც იბრძოდნენ ჩვენი ქვეყნის დამოუკიდებლობისათვის, გახდებაპირველი ქალბატონი, რომელსაც მიენიჭება ეროვნული გმირის წოდება.
მე მინდა მადლობა გითხრათ ყველას ვინც აქ ბრძანდებით, ვინც იზიარებთ ამ ემოციას; ემოციას, რომ მთავარი ღირებულებები ჩვენთვის არის უზენაესი და მათ შეიძლებაჩვენი სიცოცხლე შევწიროთ. შეიძლება ყველგან ვერ შევძლოთ ამის გაკეთება, მაგრამ ამით ვერთიანდებით.
მინდა მადლობა გადავუხადო ქალბატონი მაროს შთამომავლებს, რომლებიც ჩვენთან ერთად აქ არიან. მსურს მადლობა გადავუხადო დამსწრე საზოგადოებას - იუნკერების შთამომავლებს. მინდა მადლობა ვუთხრა ქართულ ჯარს, რომელიც აქ არის.
მინდა მადლობა ვუთხრა პირადად ქალბატონ ანა დოლიძეს, რომლისგანაც მოდის ეს იდეა და მსურს, კიდევ ერთხელ ხაზგასმით ავღნიშნო, რომ ეს ძალიან კარგი იდეა იყო.
მინდა კიდევ ერთხელ მადლობა გადავუხადო ყველა ქართველ ქალბატონს, რომელიც არის ჩვენი ქვეყნის სიძლიერის, ჩვენი ქვეყნის ჯანსაღი მომავლის გარანტი.
აქედან გამომდინარე, ვაცხადებ, საქართველოს დამოუკიდებლობისთვის ბრძოლაში გამოჩენილი გმირობისა და ქვეყნის წინაშე აღმატებული ღვაწლისთვის, წითელი ჯვრისმოწყალების დას, მარიამ (მარო) მაყაშვილს მიენიჭოს ეროვნული გმირის წოდება და გადაეცეს ეროვნული გმირის ორდენი გარდაცვალების შემდეგ"- განაცხადა საქართველოს პრეზიდენტმა.
დაჯილდოების ცერემონიას ესწრებოდნენ თავდაცვის მინისტრის მოადგილე ანა დოლიძე, საზოგადოების ცნობილი წარმომადგენლები - რატი ამაღლობელი, ლაშა ბუღაძე, ირაკლი კაკაბაძე, ასევე სანდრო გირგვლიანის ოჯახის წევრები და მეგობრები.
საქართველოს სულ 16 ეროვნული გმირი ჰყავს - მარო მაყაშვილი, ამბროსი ხელაია, ექვთიმე თაყაიშვილი, გრიგოლ ფერაძე, გიორგი მაზნიაშვილი, გიორგი კვინტრაძე, ქაიხოსრო ჩოლოყაშვილი, მერაბ კოსტავა, ზვიად გამსახურდია, მიხაკო წერეთელი, ჟიული შარტავა, ზაზა დამენია, ზურაბ იარაჯული, გიორგი ანწუხელიძე, ლეხ კაჩინსკი, ჯონ მაკკეინი.
