პარლამენტის ვიცე-სპიკერი მანანა კობახიძე და ადამიანის უფლებათა დაცვის კომიტეტის თავმჯდომარე ეკა ბესელია ირწმუნებიან, რომ მათ ყოფილი პრემიერის, ირაკლი ღარიბაშვილის მხრიდან ახალი პარტიის შესაძლო შექნის თაობაზე ინფორმაცია არ სმენიათ.
როგორც „ჯი-ეიჩ-ენ“-ს კობახიძემ განუცხადა, ამ საკითხზე შესაძლოა, ჰიპოტეზები ბევრი იყოს.
„ირაკლის პარტიაში თუ ნებისმიერ სხვა საჯარო პოზიციაზე ყოფნას, ვისურვებდი, რადგან მას შეუძლია, ქვეყანას ბევრი სიკეთე მოუტანოს და მართლა რიგითი ჯარისკაცი არ იყოს. მას უბრალო ჯარისკაცად ვერ აღვიქვამ. ირაკლი საკმაოდ წარმატებული ადამიანია, რომელიც თავისი ქვეყნის ძალიან დიდი პატრიოტია დ მას სიკეთის მოტანა ნებისმიერ პოზიციაზე შეუძლია“, - აცხადებს „ჯი-ეიჩ-ენთან” საუბარში კობახიძე.
კანონმდებელი ამბობს, რომ პარტიის შესაძლო შექმნაზე ღარიბაშვილს არაფერი უთქვამს.
„მას მიზნების შესახებ არ უსაუბრია და მე როგორ შეიძლება, ამაზე ვისაუბრო? მას მეგობრად ვთვლი და ეს ურთიერთბები ყოველთვის დარჩება. მას ჩემი მხრიდან ძალიან დიდი ნდობა აქვს და გამიხარდება, რომ ის ჩვენთან იყოს“, - დასძინა კობახიძემ.
თავის მხრივ, „ჯი-ეიჩ-ენ“-ს ბესელიამ განუცხადა, რომ მას ღარიბაშვილის მხირდან პარტიის შექმნის თაობაზე არაფერი არ სმენია.
