პრეზიდენტმა გიორგი მარგველაშვილმა სანდრო გირგვლიანის დედა ირინა ენუქიძე სიკვდილის შემდეგ, თამარ მეფის ორდენით დააჯილდოვა.
პრეზიდენტმა დაჯილდოების ცერემონიაზე ირინა ენუქიძის ღვაწლზე ისაუბრა და აღნიშნა, რომ ირინა ენუქიძე გახდა სიმბოლო ბრძოლის, რომელსაც ჰუმანურობისთვის, ადამიანის უფლებისთვის, სიცოცხლის უფლებისთვის, ძალადობის წინააღმდეგ ბრძოლა ერქვა.
„თქვენთვის ცნობილია, რომ 2015 წელი მე ქალთა წლად გამოვაცხადე. ამ წლის შეჯამებისას და დასრულებისას მე გადავწყვიტე, რომ რამდენიმე ქალბატონი გამოვყო, რომელსაც მნიშვნელოვანი წვლილი მიუძღვის ჩვენი ქვეყნის და საზოგადოების მიმართ. ეს განსაკუთრებული ადამიანების გამორჩევა მე ქალბატონი ირინა ენუქიძით დავიწყე.
ქალბატონი ირინა გახდა სიმბოლო იმ ბრძოლის, რომელსაც ერქვა ჰუმანურობისთვის, ადამიანის უფლებისთვის, სიცოცხლის უფლებისთვის, ძალადობის წინააღმდეგ ბრძოლა. მე გთხოვეთ აქ მობრძანება, რადგან ის პირველი და მცირე ჯგუფი, რომელსაც მერე მთელი საზოგადოება შეუერთდა, აქ არის წარმოდგენილი. ის ადამიანები, რომლებიც პირველივე დღეებიდან ქალბატონი ირინას გვერდით იდგნენ. ეს იყო უაღრესად მორალური ბრძოლა, რომელიც ქალბატონმა ირინამ თვითონ განსაზღვრა თავის სიტყვებით“, - განაცხადა მარგველაშვილმა.
ამასთან, პრეზიდენტის თქმით, ირინა ენუქიძე იბრძოდა სხვების შვილების გადასარჩენად და სწორედ ამ ბრძოლას შესწირა თავი.
„მას მოუკლეს შვილი, ის იბრძოდა იმისთვის, რომ სხვების შვილები გადარჩენილიყვნენ, რომ ჩვენი შვილები გადარჩენილიყვნენ და მან ამ ბრძოლას შესწირა თავისი სიცოცხლე და ეს ბრძოლა ბოლომდე მიიყვანა.
მე მინდა, პირველ რიგში, გითხრათ თქვენ მადლობა, ჟურნალისტებს, პოლიტიკოსებს, მოქალაქეებს, სანდროს მეგობრებს, ოჯახს, რომლებიც ძალიან რთულ ვითარებაში მცირერიცხოვანი ადამიანები დაუპირისპირდნენ სისტემას და ამ სისტემაში დაპირისპირებაში მორალური ძალით რეალურად სისტემის გადატეხვამდე მიგვიყვანეს.
მინდა, კიდევ ერთხელ ხაზი გავუსვა ამ ბრძოლის მთავარი სულისჩამდგმელს, ქალს, რომელმაც ამ ღირებულებებით გააერთიანა საზოგადოება. მის ღვაწლს ქვეყნისა და ერის წინაშე. აქედან გამომდინარე, ქალბატონი ირინა დღეს ჩვენთან არ არის. მისი ოჯახის წევრებია ქ არიან. მე მას გარდაცვალების შემდეგ ვაჯილდოებ ერთ-ერთი ყველაზე საპატიო ჯილდოთი, რომელიც ასევე განსაკუთრებით ქალბატონების მიმართ არის განსაზღვრული, თამარ მეფის ორდენით“, - განაცხადა პრეზიდენტმა.
ჯილდო ირინა ენუქიძის მეუღლეს გურამ გირგვლიანს გადაეცა.