საოპერო მომღერლის, ,,საქართველოს განვითარების ფონდის“ დამფუძნებელის, პაატა ბურჭულაძის მიერ დაანონსებული ფონდის პრეზენტაცია, ამ დრომდე არ გამართულა. მიმდინარე წლის ნოემბრის ბოლოს, პურჭულაძე აცხადებდა, რომ ფონდის მიზნებსა და ამოცანებზე დეტალურად დეკემბერში ისაუბრებდა
” ფონდის მიზნებზე, ამოცანებსა და სამოქმედო გეგმაზე, საქართველოს განვითარების ფონდის ოფიციალურ პრეზენტაციაზე, უფრო დეტალურად, დეკემბერში, ვისაუბრებ”, - განაცხადა ნოემბრის ბოლოს ბურჭულაძემ.
ბურჭულაძის მიერ ფონდის -” ბურჭულაძე - საქართველოს განვითარების ფონდი”, - დაარსებით მედია მას შემდეგ დაინტერესდა, რაც სააგენტო „ჯი-ეიჩ-ენმა“ გაავრცელა ინფორმაცია, რომ პაატა ბურჭულაძემ და ვანო მაჭავარიანმა ფონდი დააარსეს, რომელიც უახლოეს 2 თვეში პოლიტიკურ ძალად ჩამოყალიბდება.
საჯარო რეესტრის მონაცემებით, არასამეწარმეო (არაკომერციული) იურიდიული პირი - პაატა ბურჭულაძე - საქართველოს განვითარების ფონდი, 2015 წლის 30 ოქტომბერს დარეგისტრირდა. ამავე მონაცემებით, ფონდის სამეთვალყურეო საბჭოს თავმდჯომარეა პაატა ბურჭულაძე. წევრები არიან: ივანე მაჭავარიანი, მერაბ ტყეშელაშვილი, ირაკლი გურჩიანი. ივანე მაჭავარიანი ასევე იკავებს აღმასრულებელი დირექტორის თანამდებობას.
ირაკლი გურჩიანი "ტოიოტა ცენტრი თბილისის" დამფუძნებელია, ხოლო მერაბ ტყეშელაშვილიც ასევე ბიზნესმენია.
„ჯი-ეიჩ-ენის“ ინფორმაციით, პარტიაში იქნებიან გიორგი რუხაძე, რომელიც "ქრისტიან-დემოკრატიული მოძრაობის" საერთაშორისო მდივანი იყო, ექსპერტი ხათუნა ლაგაზიძე და იუსტიციის მინისტრის ყოფილი მოადგილე დავით ჯანდიერი.
ბურჭულაძემ პოლიტიკაში მოსვლის შესახებ გავრცელებული ეს ინფორმაცია, არც უარყოფო და არც დაადასტურა. მისი თქმით, ის პოლიტიკურ ასპარეზზე საჭიროებისამებრ გადაინაცვლებს
„მე არასდროს მიფიქრია ვყოფილიყავი ოპერის მომღერალი, მაგრამ ცხოვრებამ მომცა ამის შანსი, რომელიც გამოვიყენე. არასდროს მინდოდა ვყოფილიყავი ქველმოქმედი, მაგრამ ცხოვრებამ შექმნა ეს პირობები, რომ უნდა გავმხდარიყავი ქველმოქმედი. დღესდღეობით მე ჩამოვაყალიბე ფონდი, არ უარვყოფ. არც კის გეუბნებით და არც - არას, თუ ცხოვრება მანახებს, რომ ეს არის ჩემი გზა, ამას აუცილებლად გავაკეთებ“,- განაცხადა ბურჭულაძემ.
ამ დროისთვის კვლავ უცნობია პაატა ბურჭულაძის პოლიტიკური მომავალი, თუმცა ცნობილია ის, რომ მან 2016 წლის ყველა საკონცერტო კონტრაქტი გააუქმა. ცნობილია ისიც, რომ თუ ბურჭულაძე პოლიტიკაში მოსვლას გადაწყვეტს ამ გადაწყვეტილებას პატრიარქის ლოცვა–კურთხევის გარეშე არ მიიღებს. ბურჭულაძე მიიჩნევს, რომ პატრიარქი უნდა ერეოდეს საერო საკითხებშიც, რადგან მას 90 %-იანი მხარდაჭერა აქვს.
