პარლამენტის ბიუროს სხდომაზე, პარლამენტის თავმჯდომარე დავით უსუფაშვილი და ადამიანის უფლებათა დაცვის კომიტეტის თავმჯდომარე ეკა ბესელია ერთმანეთს დაუპირისპირდნენ.
დავით უსუფაშვილმა ეკა ბესელიას „შენიშვნა“ მას შემდეგ დაიმსახურა, რაც სპიკერმა ოპოზიციონერი დეპუტატის, ლევან ბეჟაშვილის ფიზიკური შეურაცხყოფის ფაქტი დაგმო და პარლამენტის როგორც ინსტიტუციის პატივისცემაზე ისაუბრა.
ბესელიას თქმით, მას არ ეგონა, რომ სპიკერი ამ განცხადებას გააკეთებდა და კარგია, რომ ეს განცხადება გაკეთდა.
„ძალიან პრინციპულად მიმაჩნია, რომ პარლამენტს მსგავსი დამოკიდებულება ჰქონდეს, როცა ასეთი ფაქტები ხდება და იმედი მაქვს, რომ ასეთ ფაქტებს ხშირად ადგილი არ ექნება, მაგრამ თუ ექნება, პოზიცია უნდა იყოს თანმიმდევრული და პრინციპული იმის მიუხედავად, ეს ვის ეხება. ველოდები, რომ პარლამენტს ასეთი პოზიცია ჰქონდეს და ყოველთვის ექნება, როცა ასეთი შეტევა პარლამენტის მიერ მიღებული გადაწყვეტილებების შემდეგ ხდება და ისეთი ტიპის შეურაცხყოფებები და ცილისწამებები ისმის, რაც ბოლო პერიოდში გაჟღერდა. არ არის აუცილებელი, ვინმეს თავში რაიმე მოხვდეს და ფიზიკურად დაზარალდეს, შესაძლოა, სიტყვას გაცილებით მეტი სიმძიმე მოჰყვეს. ასეთივე პრინციპული და თანმიმდევრული პოზიცია უნდა გვქონდეს, როცა ნებისმიერი ჯგუფის მხრიდან - ოპონენტი იქნება თუ თანამოაზრე, პარლამენტის მიერ მიღებული კოლექტიური გადაწყვეტილებებზე დაუშვებელი და ამაზრზენი შეტევა ხორციელდება, რომლის მოწმეებიც ბოლო პერიოდში ვართ. ბატონო დავით, თქვენგანაც ველოდები, რომ ასეთი პრინციპული პოზიცია იქნება ყოველთვის“, - მიმართა უსუფაშვილს ბესელიამ, რომელმაც ბიუროს დარბაზის დატოვება სცადა.
სპიკერმა ბესელიას საკუთარი ადგილის დაკავება მოსთხოვა და აუწყა, რომ ბიუროს სხდომა ჯერ დასრულებული არ იყო.
„არასწორად გეგონათ, არა მხოლოდ ეს. მათ შორის, ისიც ვინც, რაიმე თემაზე პრინციპულ პოზიციას აფიქსირებს და არ აფიქსირებს. ყველას მოგმართავთ, პატივი სცეთ, პარლამენტს როგორც ინსტიტუტს და მის გადაწყვეტილებებსაც და წევრებსაც. თუკი საკუთარი თავების ასე ფენებად დაყოფას დავიწყეთ, ვის მიმართ შეიძლება რაიმე და ვის მიმართ არა, ძალიან ცუდ რაღაცას მივიღებთ. ასეთი შედეგები ამ ქვეყანაში ყოფილა და ჩვენს დროსაც და შეიძლება, კიდევ მეტი იყოს. დიახ, პრინციპული დამოკიდებულებაა საჭირო და აუცილებელი. თუკი რომელიმე თქვენგანას პირადად ჩემთან რაიმე სათქმელი გაქვთ, რომ რაიმე ფორმით უპრინციპო პოზიცია დავიკავე, ძალიან გთხოვთ, ეს ცოტა უკეთ განმიმარტეთ“, - მიმართა უსუფაშვილმა ბესელიას.
თავის მხრივ, ბესელიამ საკუთარი პოზიცია დააკონკრეტა და აღნიშნა, რომ არავის უპრინციპო პოზიციაზე არ უსაუბრია.
„როგორც ერთ დეპუტატს მგონია, რომ ასეთივე პოზიცია უნდა ფიქსირდებოდეს ყოველთვის და არ არის აუცილებელი, ვინმეს თავში მოხვდეს რაიმე“, - დასძინა ბესელიამ, რომელსაც სპიკერი ისევ გამოეხაუმრა.
უსუფაშვილმა აღნიშნა, რომ მისთვის დაზუსტების შემდეგ, ბესელიას განცხადება უფრო გასაგები გახდა.
„ქალბატონო ეკა, ახლა გასაგებია. თქვენ გვიწუნებთ არა უპრინციპობას, არამედ მეტი პრინციპულობისკენ მოგვიწოდებთ. ძალიან კარგი. ქალბატონმა ეკამაც და ყველამ მოწოდება მივიღოთ იმისთვის, რომ ვიყოთ პრინციპულები და ერთიანი სტანდარტი გვქონდეს, ყველა ჩვენთაგანისადმი და როცა ვინმეს რაიმე გვეტკინება, მაშინ პრინციპულობა არ გაგვხსენდეს. ეს ძალიან ხშირად ხდება და პარლამენტმა როგორც ინსტიტუტმა ინსტიტუტის დაცვა უნდა მოვახერხოთ“, - დასძინა უსუფაშვილმა. .
