საგარეო ურთიერთობათა კომიტეტის თავმჯდომარე თედო ჯაფარიძე და პარლამენტის წევრები თინა ბოკუჩავა და ვიქტორ დოლიძე საქართველოში სამუშაო ვიზიტად მყოფ უკრაინის უმაღლესი რადას წევრებს შეხვდნენ.
უკრაინელ კოლეგებთან, უმაღლესი რადას საგარეო ურთიერთობათა კომიტეტის წევრებთან გამართულ შეხვედრაზე, მხარეებმა ურთიერთთანამშრომლობის განმტკიცების საკითხები, საგარეო პოლიტიკის მიმართულებები და რეგიონში არსებული უსაფრთხოების თემები განიხილეს.
"ეს იყო უკრაინის რადას და საქართველოს პარლამენტის ორი კომიტეტის ტრადიციული შეხვედრა. განვიხილეთ საკითხთა ფართო სპექტრი - ორი ქვეყნის ურთიერთობების, უსაფრთხოების და ჩვენი ევროპული პოლიტიკის. უკრაინას და საქართველოს ერთი სტრატეგიული დღის წესრიგი აქვთ და დღეს, ორივე ქვეყნისთვის კიდევ უფრო განსაკუთრებით მნიშვნელოვანი დღეა, ვინაიდან ველოდებით დადებით შეტყობინებას ბრიუსელიდან. შესაბამისად, ჩვენ სასაუბრო თემები ბევრი გვაქვს, როგორც ამ საკითხზე, ასევე სხვა მრავალ გამოწვევაზე", - განაცხადა თედო ჯაფარიძემ.
უკრაინის უმაღლესი რადას საგარეო ურთიერთობათა კომიტეტის პირველი მოადგილის, ივანა კლიმპუშ-ცინცაძის შეფასებით, უკრაინელმა კანონმდებლებმა ქართველ კოლეგებთან მეგობრული და ღია საუბარი გამართეს, რომელიც ორი ქვეყნისთვის მნიშვნელოვანი საკითხების განხილვას დაეთმო.
"ჩვენი შეხვედრის მთავარ თემას წარმოადგენდა ის საკითხები, თუ როგორ უნდა გავხადოთ კიდევ უფრო მჭიდრო ჩვენი ურთიერთობები და თუ რის გაკეთება შეუძლია თითოეულ მხარეს. ჩვენ საერთო მიზნები გვამოძრავებს და შესაბამისად, საერთო გამოწვევების წინაშე ვიმყოფებით, მჯერა, რომ ერთობლივი მოქმედებები ჩვენ ძალებს კიდევ უფრო მტკიცეს და შედეგიანს გახდის", - განაცხადა ივანა კლიმპუშ-ცინცაძემ.
უკრაინის უმაღლესი რადას საგარეო ურთიერთობათა კომიტეტის წევრები დღესვე საგარეო საქმეთა მინისტრს, გიორგი კვირიკაშვილს შეხვდებიან. ვიზიტის მეორე დღეს კი უკრაინის საპარლამენტო დელეგაცია შეხვედრებს თავდაცვისა და უშიშროების კომიტეტის თავმჯდომარე ირაკლი სესიაშვილთან და თავდაცვის მინისტრ თინათინ ხიდაშელთან გამართავენ.
