პარლამენტის ვიცე-სპიკერი მანანა კობახიძე მიიჩნევს, რომ თუკი პრეზიდენტს ინფორმაცია აქვს იმის შესახებ, რომ მაღალი პოლიტიკური თანამდებობის პირები ორგანიზებულ დანაშაულს სჩადიან, ამაზე რეაგირება მყისიერად უნდა მოხდეს.
როგორც ჟურნალისტებს კობახიძემ განუცხადა, ის ფიქრობს, რომ პრეზიდენტს გამოძიებისთვის რაღაც სათქმელი აქვს.
მისი თქმით, პრეზიდენტმა ჩვენება უნდა მისცეს, რადგან ელისაშვილი აცხადებს, რომ მას იმ ჩანაწერების შესახებ ჰქონდა ინფორმაცია, რომელიც ელისაშვილთან იგზავნებოდა.
„თუ ეს ინფორმაცია დანაშაულის ნიშნებს შეიცავდა, პრეზიდენტს პირდაპირი ვალდებულება ჰქონდა, რომ მასზე რეაგირება მოეხდინა და თუ მან ეს რეაგირება ვერ განახორციელა ან არ განახორციელა, ესეც გასარკვევია. ყურში ჩურჩულით და რაღაც ზეპირად ინფორმაციის მიწოდებით არავინ არ უნდა კმაყოფილდებოდეს. თუ ქვეყანაში მაღალი თანამდებობის პირები კორუფციულ, ორგანიზებულ დანაშაულს სჩადიოდნენ და მათ შორის ის ადამიანი, რომელიც პარლამენტის თავმჯდომარის მოვალეობას არაერთგზის ასრულებს, პრეზიდენტს ამაზე რეაგირება უნდა მოეხდინა. თუკი ეს ადამიანი კორუფციულ საქმიანობას ისევ აგრძელებს და პრეზიდენტი ვერ რეაგირებს, ეს ქვეყნის და ამ ინსტიტუტის ძალიან დიდი სირცხვილია. პრეზიდენტმა უნდა ბრძანოს, რა ინფორმაცია ჰქონდა“, - განაცხადა კობახიძემ.
ალეკო ელისაშვილი პრეზიდენტს მოუწოდებს იმ გზავნილების ნახვის თაობაზე დაადასტუროს ინფორმაცია, რომელიც მან გიორგი მარგველაშვილს აჩვენა.
