თბილისის მერმა დავით ნარმანიამ სოციალური საწარმოების მიერ წარმოებული პროდუქციის გამოფენა გახსნა. გამოფენა სოციალური მეწარმეობის ფორუმის ფარგლებში საგამოფენო ცენტრ "ექსპო ჯორჯიაში" გაიმართა. ფორუმის მონაწილეები საქართველოში მოქმედი სოციალური საწარმოების საქმიანობას, მათ პროდუქტებსა და სერვისებს გაეცნენ.
“ეს გახლავთ ძალიან მნიშვნელოვანი პროექტი. აღსანიშნავია ის, რომ ბოლო წლების განმავლობაში განსაკუთრებულად გააქტიურდა სოციალური მეწარმეობა და სულ უფრო მეტი საწარმო იხსნება. აქ არიან დასაქმებულები სოციალურად დაუცველი ადამიანები, შშმ პირები, ისეთი მოქალაქეები, რომელთაც განსაკუთრებული ზრუნვა სჭირდებათ. ისინი აწარმოებენ პროდუქციას და შემდგომ ყიდიან, შესაბამისად, იღებენ შემოსავალს. თუმცა, მოგეხსენებათ, სოციალური საწარმოები ძირითადად მოგებაზე არ არის ორიენტირებული და მათ სოციალური დატვირთვა გააჩნიათ. ამიტომაც, თბილისის მერია აქტიურად უჭერს მხარს აღნიშნულ პროექტს, რამდენიმე სოციალურ საწარმოს ჩვენ უკვე დავეხმარეთ ეკონომიკური განვითარების პროგრამების ფარგლებში, რათა მოეწესრიგებინათ სამუშაო ინფრასტრუქტურა - შემდგომი განვითარების მიზნით. მათთან თანამშრომლობას ჩვენ მომავალშიც აქტიურად ვგეგმავთ”, - განაცხადა თბილისის მერმა დავით ნარმანიამ.
სოციალური მეწარმეობის ფორუმი თბილისის მერიის, ევრაზიის თანამშრომლობის ფონდის და საქართველოს სტრატეგიული კვლევებისა და განვითარების ცენტრის ორგანიზებით გაიმართა. ღონისძიების მიზანია სოციალური მეწარმეობის, როგორც სოციალური მიზნების მქონე ბიზნეს-მოდელის, განვითარება და ხელშეწყობა.
ფორუმში მონაწილეობა დედაქალაქის მერიის, სოციალური საწარმოების, არასამთავრობო ორგანიზაციების და ბიზნესსექტორის წარმომადგენლებმა მიიღეს. სოციალური მეწარმეობის განვითარების საკითხებზე მომუშავე ორგანიზაციებმა და სოციალურმა მეწარმეებმა 2015 წლის განმავლობაში განხორციელებული საქმიანობის შედეგები და მიღწევები შეაჯამეს და სამომავლო გეგმები და პრიორიტეტები განიხილეს.
კონფერენცია მეოთხედ ჩატარდა და წელს მისი მთავარი თემები იყო: სოციალური მეწარმეობა საქართველოში, 2015 წლის მიღწევები და საქმიანობის შედეგები; სოციალური მეწარმეობის სამომავლო განვითარების ხედვა და პრიორიტეტები; საჯარო და კერძო სექტორის მხარდაჭერის შესაძლებლობები სოციალური მეწარმეობის განვითარებისათვის; სოციალური საწარმოების პროდუქციის და მომსახურების პოპულარიზაციის ხელშეწყობა.
