საქართველოს ეკონომიკისა და მდგრადი განვითარების სამინისტროს მეწარმეობის განვითარების სააგენტომ საქართველოს ინოვაციებისა და ტექნოლოგიების სააგენტოსთან თანამშრომლობით საქართველოს ევროპის მეწარმეთა ქსელში (Enterprise Europe Network – EEN) ჩართვის თაობაზე ღონისძიება გამართა.
14 დეკემბერს, 10:00 საათზე, ღონისძიებაზე მეწარმეობის განვითარების სააგენტოს ქსელში მონაწილეობა და როლი იქნა განხილული, რასთან ერთადაც ევროკავშირთან ღრმა და ყოვლისმომცველი თავისუფალი სავაჭრო სივრცის შესახებ შეთანხმებისა (DCFTA) და საქართველოსა და ევროკავშირს შორის ასოცირების შეთანხმების ფარგლებში ვაჭრობის მიმართულებით ტექნიკური ბარიერების თემებზეც გამახვილდება ყურადღება.
მეწარმეობის განვითარების სააგენტო, როგორც კონსორციუმის წამყვანი უწყება პასუხისმგებელია საქართველოში კონკრეტული, ბიზნესის განვითარებასთან დაკავშირებული აქტივობების დაგეგმვასა და განხორციელებაზე, ხოლო ინოვაციებისა და ტექნოლოგიების სააგენტო საკუთარი პროფილის შესაბამის საქმიანობებს გაუწევს ორგანიზებას.
ხსენებული ქსელი ბიზნეს თანამშრომლობის ცენტრების მეშვეობით ხელს უწყობს კომპანიების:
- 500 მილიონიანი მომხმარებლით დაკომპლექტებულ სიცოცხლისუნარიან ბაზარზე წვდომას
- ტექნოლოგიების გაცვლის საშუალებით პროდუქციის ხარისხის ამაღლებასა და კონკურენტუნარიანობის გაზრდას
- თავსებადი ევროპელი პარტნიორების მოძიებას
- ევროპის მასშტაბით ახალ საწარმოო არხებთან წვდომის გაუმჯობესებას
EEN წარმოადგენს პლატფორმას, რომელიც ემსახურება ევროკავშირისა და პარტნიორი ქვეყნების მცირე და საშუალო ბიზნესის წარმომადგენელთა შორის კონკრეტული ბიზნეს შემოთავაზებების ურთიერთგაცვლასა და კავშირების დამყარებას. EEN ქართული კომპანიებისთვის ახალ შესაძლებლობებს ქმნის ევროკავშირის ბაზარზე ფართოდ გაავრცელონ საკუთარი ბიზნეს წინადადებები და მოიზიდონ შესაბამისი პარტნიორები.
შენიშვნა:
აღნიშნული ქსელი მსოფლიოს ერთ-ერთი უდიდესი, ბიზნესისა და ინოვაციების ხელშემწყობი ორგანოა, რომელიც 54 ქვეყანაში 600 პარტნიორ ორგანიზაციასა და მეწარმეთა მომსახურების ფართო სპექტრს აერთიანებს, ამასთანავე, ევროკავშირის სტრატეგიის მნიშვნელოვანი ინსტრუმენტია და კერძო სექტორის განვითარებასა და დასაქმების ზრდისკენაა მიმართული.
ყველაფერთან ერთად, ცენტრალური ქსელის საერთო ინფორმაციასთან წვდომა და სხვა აღნიშნული უპირატესობები მრავალმხრივ საშუალებას ქმნის მეწარმეობის კუთხით არსებული მდგომარეობის გასაუმჯობესებლად. მეწარმეობის განვითარების სააგენტოსთვის ქსელში ჩართულობა და მოწინავე ორგანიზაციასთან თანამშრომლობა კიდევ ერთი მნიშვნელოვანი მექანიზმია საერთაშორისო პარტნიორების მოზიდვის, ქვეყნის კერძო სექტორის განვითარების, საერთაშორისო სტანდარტების შესაბამისად წარმოების დონისა და საექსპორტო პოტენციალის გაზრდის კუთხით.
