"თავისუფალი დემოკრატები" საყდრისის აფეთქების ფაქტის გამოძიების პირობას დებენ, - ამის შესახებ ნათქვამია "თავისუფალი დემოკრატების" მიერ საყდრისთან დაკავშირებით გავრცელებულ განცხადებაში.
"თავისუფალი დემოკრატები" მიიჩნევს, რომ 12 დეკემბერს საქართველოს სახელმწიფომ დანაშაული ჩაიდინა. "შარშან, 2014 წლის 12 დეკემბერს, ხელისუფლების ნებართვით, კერძო კომპანიამ ააფეთქა საყდრისი-ყაჩაღიანის გორა. ამის შედეგად განადგურდა არქეოლოგიური ობიექტი, რომელიც სავარაუდოდ მსოფლიო კულტურის ძეგლიც უნდა ყოფილიყო - მსოფლიოში უძველესი, ჩვენს წელთაღრიცხვამდე მეოთხე ათასწლეულის ოქროს საბადო.
აფეთქების თავიდან ასაცილებლად იღწვოდა საყდრისის გადარჩენის კომიტეტი, რომელშიც არქეოლოგები, ხელოვნებათმცოდნეები და საზოგადოების სხვა წევრები შედიოდნენ. საყდრისის დაცვაში მონაწილეობდნენ სტუდენტები. საყდრისის დასაცავად თბილისში იმართებოდა აქციები, ხოლო თავად ობიექტის სიახლოვეს კვირების განმავლობაში მორიგეობდნენ კიმიტეტის წევრები და მოხალისეები. საყდრისის განსაკუთრებული მნიშვნელობისა და ღირებულების შესახებ წერდნენ უცხოელ მეცნიერებიც. ამ ყველაფრის მიუხედავად, ისე, რომ დამაჯერებელი არგუმენტები არ წარმოუდგენია, მთავრობამ საყდრისი გამოაცხადა უბრალო არქეოლოგიურ ობიექტად და მისი განადგურების ნებართვა გასცა.
საყდრისის საკითხის გამოსაძიებლად ,,თავისუფალმა დემოკრატებმა" პარლამენტში მოვითხოვეთ სპეციალური საგამოძიებო კომისიის შექმნა. ჩვენი მოთხოვნა პარლამენტის უმრავლესობამ ჯერ მიზანშეწონილად ცნო, მაგრამ შემდეგ აღარ აღასრულა თავისივე გადაწყვეტილება და საყდრისის განადგურების კანონიერება დღემდე გაურკვეველი რჩება. გასული წლის 12 დეკემბერს ქვეყნის ხელისუფლებამ საზოგადოების მეცნიერულად არგუმენტირებულ მოთხოვნას დაუპირისპირა დამაჯერებელობას მოკლებული, ნაჩქარევი დასკვნები და უხეში ძალმომრეობა.
ჩვენ, ,,თავისუფალ დემოკრატებს", მიგვაჩნია, რომ ევროპულ ოჯახში საქართველოს ღირსეულად ვერ შეიყვანს აღმასრულებელი ხელისუფლება, რომელიც ასე ექცევა თავის კულტურულ მემკვიდრეობას და საზოგადოებას. დემოკრატიას ვერ დაამკვიდრებს საკანონმდებლო ხელისუფლება, რომელიც უარს ამბობს თავის კონსტიტუციურ მოვალეობაზე, გააკონტროლოს მთავრობის საქმიანობა.
ჩვენ კი, ,,თავისუფალი დემოკრატები" ყველაფერს გავაკეთებთ იმისთვის, რომ საზოგადოებას არ დაავიწყდეს ეს საშინელი დანაშაული და პასუხი აგოს ყველამ, ვინც ეს დანაშაული შეუკვეთა, ვინც ეს დანაშაული ჩაიდინა და ვინც არ დაუშვა ამ დანაშაულის გამოძიება", -ნათქვამია "თავისუფალი დემოკრატების" განცხადებაში.
