საპარლამენტო უმრავლესობის წევრი ომარ ნიშნიანიძე „ნაციონალურ მოძრაობას“ დემაგოგიაში ადანაშაულებს და უმცირესობას მოუწოდებს წარსული გაიხსენოს.
დღევანდელ პლენარულ სხდომაზე ნიშნიანიძე უმცირესობას დაუპირისპირდა და პოლ ვალერის სიტყვები გაიხსენა - „ძალაუფლება მისი ბოროტად გამოყენების გარეშე ყოველგვარ მიმზიდველობას კარგავს“.
ნიშნიანიძის თქმით, ახალი ხელისუფლების დროს ქვეყანამ მიმზიდველობა დაკარგა, რადგან მმართველი გუნდი ძალაუფლებას ბოროტად არ იყენებს.
„თქვენი გამოსვლები მიზანმიმართული დემაგოგიაა და სპეკულირებაა იმ ბავშვების ბედით, რომელიც პარლამენტთან დააკავეს. როდესაც თქვენ პროკურატურასა და საასამრთლოზე ლაპარაკობთ, როგორ შეიძლება, თქვენი წარსული არ გაიხსენოთ? გავიწყდებათ, ტელევიზიებსა და ჟურნალისტებს რას უშვებოდით? როდესაც ჩიორა თაქთაქიშვილის ცხვირს ლორთქიფანიძის პიჯაკს ადარებთ, მაშინ თაქთაქიშვილის ცხვირი თუნდაც ვალერი გელაშვილის ცემას შეადარეთ. თქვენი ხელმძღვანელი მეფე დესპოტივით იყო, რომლის ხელში ხელისუფლების სამი შტო იყო. მათ შორის, მედიაც. ბრძანება იყო, აბა, ეს დაიჭირეთ, ეს მოკალითო. როცა პირიდან სიტყვის ფაღარათი გჭირთ, იქნებ, ერთხელ მაინც სიმართლე წამოგცდეთ“, - მიმართა ნაციონალებს ნიშნიანიძემ.
პლენარულ სხდომაზე ამ წუთებში, უმცირესობის მიერ მომზადებულ რეზოლუციის პროექტებზე მსჯელობენ, რომელიც „ნაციონალური მოძრაობის“ დაკავებული მხარდამჭერების - ნიკა ნარსიას, გიორგი გაბუნიასა და ერეკლე დეისაძეს ეხება. აღნიშნული პირები დეპუტატ დავით ლორთქიფანიძესთან ფიზიკური დაპირისპირების გამო დააკავეს.
