„ახალი მემარჯვენეების“ ინიციატივით  მომზადებული საქართველოში მოქმედი პოლიტიკური პარტიების ერთობლივი მიმართვა  ევროკავშირის წევრ ქვეყნებში საქართველოს მოქალაქეების უვიზო მიმოსვლასთან დაკავშირებით დღეს საქართველოში ევროკავშირის წარმომადგენლობის ხელმძღვანელს  იანოშ ჰერმანს გადაეცა.

მიმართვას  ევროკომისიის, ევროპარლამენტის, ევროკავშირის საბჭოს, ევროპული საბჭოს, ევროკავშირის საგარეო ურთიერთობათა სამსახურსადმი  ხელს აწერს  საქართველოში მოქმედი 17 ძირითადი  პოლიტიკური პარტია, როგორც საპარლამენტო, ისე არასაპარლამენტო, მათ შორის სახელისუფლებო კოალიციაში შემავალი რესპუბლიკური პარტია.

როგორც ევროკავშირის წარმომადგენლობის ხელმძღვანელთან შეხვედრის წინ „ახალი მემარჯვენეების“ პოლიტიკურმა მდივანმა მანანა ნაჭყებიამ განაცხადა „ახალმა მემარჯვენეების“  ეს ინიციატივა  ემსახურება საქართველოში მოქმედი პოლიტიკური პარტიების პასუხისმგებლობის გამოხატვას  და გარკვეულ გარანტიებსაც  ევროკავშირისთვის, რომ საქართველო მზად არის ვიზალიბერალიზაციასთან დაკავშირებული დადებითი  გადაწყვეტილებისათვის.

 „მიუხედავად იმისა, რომ რამდენიმე დღის განმავლობაში ვცდილობდით  პარტია ქართული „ქართული ოცნების“, ეროვნული ფორუმის, „მრეწველების“  და კონსერვატორების დარწმუნებას,  სამწუხაროდ, ჩვენთვის გაუგებარი მიზეზების გამო, ამ მიმართვას მათ  ხელი  არ მოაწერეს. რა დგას ამ უცნაური გადაწყვეტილების უკან, ძნელი ასახსნელია. ხუთიდან ოთხმა სახელისუფლებო პარტიამ პრაქტიკულად ხელი შეუშალა იმას, რომ ვიზალიბერალიზაციასთან დაკავშირებით  მომხდარიყო საქართველოში მოქმედი ყველა  ძირითადი პოლიტიკური პარტიის სრული კონსოლიდაცია. ეს კიდევ ერთხელ მიანიშნებს, რომ მათთვის ამ მნიშვნელოვან საკითხზე თანხმობაზე მაღლა ვიწროპარტიული ინტერესები დგას,“- განაცხადა მანანა ნაჭყებიამ.

ევროკავშირის ელჩმა იანოშ ჰერმანმა ხაზი გაუსვა იმას, რომ ეს მიმართვა მართლაც ძალზე მნიშვნელოვანი დოკუმენტია.