,,ერთიანი ნაციონალური მოძრაობის” ვიზიტი აშშ-ში გრძელდება. დავით ბაქრაძე, გიგა ბოკერია, გიორგი კანდელაკი და ირმა ნადირაშვილი დღეს სენატორ ჯონ მაკკეინს შეხვდნენ. განხილვის მთავარი თემები NATO-სთან ურთიერთობა და ამერიკის ყურადღების ცენტრში საქართველოს ინტერესების შენარჩუნება იყო.
„ჩვენთვის ძალიან მნიშვნელოვანია, რომ საქართველოს საკითხი დღის წესრიგში იყოს, რაც შეიძლება მაღლა. ჩვენი განხილვის საგანი იქნება, რა თქმა უნდა, უსაფრთხოების თემები და ის გამოწვევები, რაც აქვს საქართველოს მთელ რეგიონს. საქართველოს შიგნით განვითარებული მოვლენები, რომლებიც, პრინციპში, ერთ საერთო კომპლექსურ სურათს ქმნის. ჩვენი ამოცანაა, რომ საქართველოს ინტერესები იყოს მუდმივად ყურადღების ქვეშ ჩვენი მთავარი სტრატეგიული პარტნიორის. ამ თვალსაზრისით ის ჩავარდნა, რომელიც ჩვენ გვაქვს ახალი მთავრობის მოსვლის შემდეგ, რაღაცნაირად ნაწილობრივ იქნეს დაკომპენსირებული. სრულად დაკომპენსირება ვერ მოხდება, სანამ ეს მთავრობა დემოკრატიული წესით არ შეიცვლება. ჩვენ ვთვლით, რომ საქართველოს უსაფრთხოებისა და მომავლისთვის ის, რასაც აკეთებს ქვეყნის შიგნით ივანიშვილის რეჟიმი, პირდაპირ საფრთხეს წარმოადგენს და ასე თვლის ყველა ის, ვინც საქართველოს მთავარი მხარდამჭერია, მათ შორის ამ ქალაქშიც“, - განაცხადა ნაციონალური მოძრაობის ლიდერმა გიგა ბოკერიამ.
