პარლამენტის ჯანდაცვის კომიტეტი ოპოზიციონერი დეპუტატის, აკაკი ბობოხიძის მიერ მომზადებული საკანონმდებლო ინიციატივის პლენარულ სხდომაზე განხილვას მხარს უჭერს, რომელიც მარეგულირებელი ორგანოებისა და „საპარტნიორო ფონდის” ხელმძღვანელის ხელფასების შემცირებას ითვალისწინებს.
ბობოხიძემ დეპუტატებს ცვლილებების არსი კომიტეტის დღევანდელ სხდომაზე გააცნო და განმარტა, რომ ცვლილებები მარეგულირებელი ორგანოებისა და „საპარტნიორო ფონდის” ხელმძღვანელის ხელფასის ოდენობის საკონსტიტუციო სასამართლოს მოსამართლებთან გათანაბრებას გულისხმობს.
ბობოხიძის განცხადებით, „საპარტნიორო ფონდის” მთავარი აღმასრულებლის ხელფასი 21 ათასი ლარით არის განსაზღვრული, კომუნიკაციის ეროვნული კომისიის თავმჯდომარის ხელფასი 16 640 ლარია, „სემეკი“-ს თავმჯდომარის ხელფასი – 12 ათასი ლარი, ხოლო წევრების – 11 900 ლარი.
ცვლილებებს უმრავლესობის წევრების მსგავსად, მხარი მიხეილ მაჭავარიანმაც დაუჭირა და აღნიშნა, რომ მას მარეგულირებელი კომისიების საწინააღმდეგი არაფერი აქვს, თუმცა, მიიჩნევს, რომ საკონსტიტუციო სასამართლოს წარმომადგენლების 84 ათასიანი წლიური ხელფასი საკმარისია იმისთვის, რომ საჯარო მოხელეები კორუფციულ გარიგებებში არ შევიდნენ და საქმე ისე აკეთონ.
ოპოზიციონერებს კომიტეტის თავმჯდომარე დიმიტრი ხუნდაძე გამოეხმაურა და აღნიშნა, რომ სახელფასო სტრუქტურა მოსაწესრიგებელია და კომიტეტი საკითხის პლენარულს სხდომაზე გატანას მხარს დაუჭერს.
