მარჯვენასაჭიანი ავტომანქანების რეგისტრაციის აკრძალვის თაობაზე პარლამენტში მიმდინარე კვირას იმსჯელებენ. ინიციატივას მიესალმება მმართველი გუნდის ნაწილი. რესპუბლიკურ პარტიაში განმარტავენ, რომ რეგისტრაციის აკრძალვით პრობლემები არ შეექმნება მათ, ვისაც უკვე ჰყავს მარჯვენასაჭიანი ავტომობილი. ინიციატივა შინაგან საქმეთა სამინისტროს ეკუთვნის. ცვლილების თანახმად, რეგისტრაციის აკრძალვის გარდა, ყველა კატეგორიის მართვის მოწმობას 100 ქულა მიენიჭება და პატრულის მიერ დაჯარიმების შემთხვევაში ქულათა გარკვეული რაოდენობა დააკლდება. თუ ქულები განულდება, მოქალაქეს გამოცდის ჩაბარება თავიდან მოუწევს.
