მოწმის დაკითხვის ახალ წესზე პარლამენტში დღეს იმსჯელებენ. სისხლის სამართლის საპროცესო კოდექსსა და სხვა კანონებში შესატანი ცვლილებების პროექტს ადამიანის უფლებათა დაცვის კომიტეტის სხდომაზე განიხილავენ. მთავრობის პროექტით მოწმის გამოკითხვა გამომძიებლის მხრიდან ნებაყოფლობითი იქნება, მაგრამ თუ ის ინფორმაციის მიწოდებაზე უარს ამბობს და პროკურორს მიაჩნია, რომ მოწმე მნიშვნელოვან ინფორმაციას ფლობს, მაშინ უფლება ექნება სასამართლოს თანხმობის შემთხვევაში მოწმე მოსამართლის თანდასწრებით დაიკითხოს. კანონპროექტის მიხედვით, სისხლის სამართლის გარკვეულ დანაშაულებზე მოწმეთა დაკითხვის ძველი წესი ნარჩუნდება, რომელიც ჩვენების მისაცემად მოწმის საგამოძიებო ორგანოში დაბარებას ითვალისწინებს.
