მთავრობამ „ადმინისტრაციულ სამართალდარღვევტა კოდექსში“ ცვლილებები მოამზადა, რომლის გათვალისწინებით, ბენზინისა და დიზელის საწვავის ხარისხისა და შემადგენლობის ნორმების დარღვევაზე ადმინისტრაციული პასუხისმგებლობა წესდება.
პარლამენტში წარდგენილი ცვლილებებით, ისეთი ბენზინისა და დიზელის საწვავის საქართველოში იმპორტი, რომლის ხარისხიც საქართველოს მთავრობის დადგენილებით განსაზღვრულ საავტომობილო ბენზინის ხარისხობრივ ნორმებს ან/და დიზელის საწვავის შემადგენლობის ნორმებს ვერ აკმაყოფილებს, დაჯარიმებას 10 000 ლარის ოდენობით გამოიწვევს.
ინიციატივით, ისეთი ბენზინის ან დიზელის საწვავის საქართველოს ტერიტორიაზე წარმოება, რომლის ხარისხიც მთავრობის დადგენილებით განსაზღვრულ ნორმებს ვერ აკმაყოფილებს, დაჯარიმებას 9 000 ლარის ოდენობით გამოიწვევს, ხოლო ასეთი ბენზინის და დიზელის საწვავის შენახვა, განთავსება ან მიწოდება გამოიწვევს დაჯარიმებას 8 000 ლარის ოდენობით.
ამას გარდა, კანონპროექტით, სანქციები წესდება ისეთები სამართალდარღვევისთვის, როგორიცაა: სასარგებლო წიაღისეულის მოპოვების ან წიაღით სარგებლობის ლიცენზიის პირობების დარღვევა, ზღვის დაბინძურება, სატრანსპორტო საშუალების გარეცხვა ზღვაში, ტბაში, წყალსაცავში, მდინარეში ან ზედაპირული წყლის სხვა ობიექტების ნებართვის ან ეკოლოგიური ექსპერტიზის დასკვნით გათვალისწინებული პირობების დარღვევა, გარემოსდაცვითი ტექნიკური რეგლამენტების მოთხოვნების დარღვევა.
