პარლამენტის იურიდიულ საკითხთა კომიტეტის თავმჯდომარე ვახტანგ ხმალაძე „მწვანეთა პარტიის“ ლიდერის, გია გაჩეჩილაძის მიერ მომზადებულ „საარჩევნო კოდექსის” ცვლილებების პროექტს მხარს არ უჭერს.
როგორც კომიტეტის დღევანდელ სხდომაზე ხმალაძემ განაცხადა, ის პროექტში იმის საფრთხეს ხედავს, რომ ხვალ პარლამენტში ასი სხვადასხვა პარტიის წევრი აღმოჩნდება.
მისი თქმით, ის, რომ საარჩევნოდ პოლიტიკური პარტიების რეგისტრირება ერთმანეთისგან განსხვავებულად ხდება, ამას საფუძვლად პარტიის გარკვეული ლეგიტიმაცია უდევს, რომელიც ამომრჩეველმა მაშინ გააკეთა, როდესაც ამა თუ იმ კანდიდატს მხარი დაუჭირა.
„ვინც ამომრჩევლეთა მხრიდან ლიგიტიმაცია მიიღო, მას ხელმოწერების შეგროვება არ სჭირდება. შესაბამისად, თუ ამომრჩეველი პირს, როგორც კონკრეტული პარტიის წარმომადგენელს არ ირჩევს, მაშინ ეს ლეგიტიმაციის ხარისხი არ არის. მინდა ისტორიაც შეგახსენოთ - 1992-1995 წლებში, „საარჩევნო კოდექსში” მსგავსი ნორმა იყო, რომლის საფუძველზეც 1995 წელს პარლამენტში ერთბაშად საკმაოდ ბევრი პარტიის წარმომადგენელი გაჩნდა, ანუ ადრე არ იყვნენ და შემდეგ პარლამენტის წევრები სხვადასხვა პარტიებში შევიდნენ. ამის საფუძველზე ამ პარტიებმა უფლება მიიღეს, რომ საარჩევნო რეგისტრაცია მხარდამჭერთა ხელმოწერების შეგროვების გარეშე გაევლოთ. სწორედ ამის შემდეგ კონსტიტუციაში ნორმა ჩაიწერა, რომლის მიზანიც ამის ჩაკეტვა იყო”, - დასძინა ხმალაძემ.
შეგახსენებთ, რომ გაჩეჩილაძის მიერ მომზადებული ცვლილებებით, საპარლამენტო არჩევნებში რეგისტრაციის მიზნით, 25 ათასი ხელმოწერის შეგროვება არ მოუწევს პარტიას, რომელსაც საპარლამენტო არჩევნებში მონაწილეობა მიღებული არ აქვს, მაგრამ რომლის წევრიც დეპუტატია.
