სურსათის ეროვნული სააგენტოს უფროსის, ზაზა დოლიძის ინფორმაციით, საკარანტინო მავნებლების წინააღმდეგ შესაბამისი ღონისძიებები გატარდა, რის შედეგადაც განადგურებას 6 მლნ ლარის ღირებულების სასოფლო-სამეურნეო კულტურები გადაურჩა.
პარლამენტის აგრარულ საკითხთა კომიტეტის სხდომაზე, დღეს, დოლიძემ სააგენტოს მიერ 2015 წელს გაწეული საქმიანობის შესახებ ანგარიში წარადგინა.
დოლიძის ცნობით, სამომხმარებლო ბაზრის კონტროლის მასშტაბები მნიშვნელოვნად გაფართოვდა და 7067 ბიზნესოპერატორის დოკუმენტური შემოწმება განხორციელდა, რაც წინა წლის მონაცემებს სამჯერ აღემატება.
მისი მტკიცებით, კონტროლის მასშტაბების გაზრდის შედეგად, ვადაგასული სურსათის რეალიზაციის გამოვლენის ფაქტები შემცირდა და ღვინოსა და სხვა ალკოჰოლიან სასმელებზე კონტროლი გამკაცრდა.
„გმო-ს კვლევა სხვადასხვა დასახელების სურსათის 80 ნიმუშს ჩაუტარდა. ინსპექტირებულია 910 საბავშვო ბაგა-ბაღისა და 361 სკოლის სასადილო, რაც წინა წლის მონაცემებს 93 %-ით აჭარბებს. ქვეყანაში ეპიზოოტიური კეთილსაიმედოობის უზრუნველსაყოფად ცხოველთა ჯანმრთელობაზე ეფექტიანი კონტროლი განხორციელდა“, - განაცხადა დოლიძემ.
