პარტია „ქართული ოცნება-დემოკრატიული საქართველოს“ 2016 წლის საარჩევნო სია მზად, სავარაუდოდ, დეკემბრის ბოლომდე იქნება.
როგორც „ჯი-ეჩ-ენს“ პოლიტიკურ კულუარებში განუცხადეს, საპარლამენტო არჩევნების სიისთვის მუშაობა დასკვნით ეტაპზეა და მას ყოფილი პრემიერ-მინისტრი ბიძინა ივანიშვილი პირადად კურირებს.
წყაროს ცნობით, აღნიშნული სიის შემადგენლობა მმართველი გუნდისთვისაც გასაიდუმლოებულია. თუმცა, მისივე ინფორმაციით, უმრავლესობის არსებული შემადგენლობის ნახევარზე მეტი სიაში ვეღარ მოხვდება და ისინი სხვადასხვა უწყებებში დასაქმდებიან.
რაც შეეხება კოალიციაში შემავალი სხვა პარტიების საარჩევნო სიას, ამ საკითხზე მუშაობა მათაც დაწყებული აქვთ. თუმცა, იქედან გამომდინარე, რომ კოალიციაში შემავალ პარტიებზე მანდატები ჯერ კიდევ გადასანაწილებელია, „რესპუბლიკელები“, „მრეწველები“, „ეროვნული ფორუმი“ და „კონსერვატორები“ პარტია „ქართულ ოცნებასთან“ კონსულტაციების გამართვას ელოდებიან.
