თბილისის მერი დავით ნარმანიამ 13 ივნისის სტიქიის შედეგად დაზარალებულებისთვის საწყობებში არსებულ პროდუქტებზე და მათი განაწილების საკითხზე პირველ კომენტარს აკეთებს. დედაქალაქის მერის თქმით, მოსახლეობას ურიგდებოდა ყველაფერი, რაც გათვალისწინებული იყო დადგენილი ნორმის მიხედვით.ნარმანიას თქმით, ვერავინ ვერ იტყვის იმას, რომ ვინმემ რაიმე რაც მათთვის კუთვნილი იყო, ვერ მიიღო.
"მოსახლეობას ურიგდებოდა ის ყველაფერი, რაც გათვალისწინებული იყო, შესაბამისად, ჩვენს მიერ დადგენილი ნორმის მიხედვით. კერძოდ, როცა ხდებოდა დაზარალებულთა საცხოვრებლით უზრუნველყოფა, ამის შემდეგ ეძლეოდათ მათ ის აუცილებელი რამ, რაც სტიქიით დაზარალებული ადამიანებისთვის იყო საჭირო. ხოლო რაც შეეხება კვების პროდუქტებს, ტანსაცმელსა და სხვა პროდუქტებს, ძალიან ოპერატიულად რიგდებოდა სტიქიის დღეებშივე. ამიტომ ვერავინ ვერ იტყვის, რომ ვინმემ, რაიმე, რაც მათთვის კუთვნილი იყო, ვერ მიიღო", - განაცხადა დავით ნარმანიამ.
შეგახსენებთ, რომ ტელეკომპანია "რუსთავი-2"-მა გაავრცელა ინფორმაცია იმის შესახებ, რომ სტიქიით დაზარალებულთათვის განკუთვნილი პროდუქტები საწყობში ამ დრომდე ინახება. მათი ნაწილი ფუჭდებოდა და დაზარალებულები პროდუქტებსა და ტანსაცმელს დროულად ვერ იღებდნენ.
