26-27 ნოემბერს, თბილისს ბელორუსიის ოფიციალური დელეგაცია სტუმრობს. ვიზიტის მიზანია საქართველოში განხორციელებული საგადასახადო, საბაჟო და ელექტრონული მმართველობის რეფორმების გაცნობა.
ბელორუსიის ეკონომიკის სამინისტროს და ფინანსთა სამინისტროს საგადასახადო, საბაჟო და შემოსავლების დეპარტამენტების ხელმძღვანელებს კვლევითმა ცენტრმა PMC Research უმასპინძლა.
კვლევითმა ცენტრი სტუმრებს გააცნობს იმ ნაბიჯებს, რომელიც აუცილებელია ეკონომიკური გარემოს გაუმჯობესებისთვის. კერძოდ, საგადასახადო სისტემის ოპტიმიზაცია, გადასახადების გადამხდელებისთვის დამატებითი ბარიერების მოხსნისთვის; ბიუროკრატიული პროცედურების მინიმალურ დონეზე დაყვანის მნიშვნელობა; ეფექტური ელექტრონული მმართველობის (e-government) სისტემის დანერგვის აუცილებლობა, პირდაპირი უცხოური ინვესტიციების მოზიდვისთვის.
ვიზიტის ფარგლებში, დელეგაცია ესტუმრება ადგილობრივ საჯარო დაწესებულებას, მათ შორის იუსტიციის სახლს, შესყიდვების სააგენტოს და შემოსავლების სამსახურს. ისინი ადგილზე გაეცნობიან განახლებული მექანიზმების და სისტემების ეფექტიანობას.
ვიზიტი განხორციელდა ვიშეგრადის საერთაშორისო ფონდის ფინანსური მხარდაჭერით. თანამშრომლობის ფარგლებში, PMC Research მეორე შეხვედრას გამართავს მინსკში, სადაც ბელორუსიას წარმატებულ გამოცდილებას ვიშეგრადის ქვეყნები (ჩეხეთის რესპუბლიკა, უნგრეთი, პოლონეთი და სლოვაკეთი) გაუზიარებენ.
