საქართველოს ყოფილი პრეზიდენტი „ბოევიკთა“ გარკვეულ ჯგუფებს აკონტროლებს, - ასეთ სკანდალურ ვერსიას სოციალურ ქსელ „ფეისბუქში“ პოლიტიკოსი თემო მურვანიძე გამოთქვამს.
„არსებობს სერიოზული ვარაუდი, არ გამოვრიცხოთ ISIS-ის სახელით გავრცელებული ქართულენოვანი ვიდეოები ისევ ჩვენი ქვეყნის შიდა პოლიტიკას უკავშირდებოდეს. ვგულისხმობ იმას, რომ სანამ უკრაინული „ვიკილიქსი“ ოდესის გუბერნატორის და ამერიკელი მაღალჩინოსნის საუბრების ჩანაწერებს გამოაქვეყნებდა, არსებობდა გარკვეული დაუზუსტებელი ინფორმაციები ყოფილი პრეზიდენტის მიერ „ბოევიკთა“ ჯგუფების კონტროლის შესახებ.
ეს ერთი ავანტიურისტის მიერ შექმნილი გასამხედროებული ჯგუფებია, რომლებიც 2012 წელს სამეგრელოს ტყეებში იყვნენ, შემდეგ უკრაინაში ომობდნენ და მათი ნაწილი სირიაში აღმოჩნდა, „ისლამური სახელმწიფოს“ სამხედრო დაჯგუფებებში“, - წერს თემო მურვანიძე და იქვე განმარტავს, რომ ეს სიფრთხილით გამოსაძიებელი ვერსიაა..
„ყოფილი პრეზიდენტი და ამჟამად ოდესის გუბერნატორი ყველაფერზე წავა, რათა საქართველოში დესტაბილიზაცია გამოიწვიოს და ამისათვის მის მიერ კონტროლირებად ტერორისტულ დაჯგუფებებს იყენებს.
ძალიან დიდი მნიშვნელობა ექნება ამ ტერორისტების დაკავებას და მათ დაკითხვას, დარწმუნებული ვარ, ის ინფორმაციები, რასაც ისინი ფლობენ სწორედ ამ მიმართულებით, ბევრ საკითხს მოჰფენს ნათელს,“ - წერს პოლიტიკოსი თემო მურვანიძე სოციალურ ქსელში.
სტატუსის გამოქოვეყნების შემდეგ, თემო მურვანიძეს დავუკავშირდით, რომელმაც თემა აღარ განავრცო, თუმცა რამდენიმე მინიშნება გააკეთა. კერძოდ, მისი თქმით, არსებობს ვერსია, რომ თავის დროზე დავით კეზერაშვილმა სირიაში სარაკეტო დანადგარები გაყიდა, ანუ მურვანიძის ვერსიით, სირიის ამბოხებულებსა და სააკაშილს გუნდს შორის კავშირი დიდი ხანია, არსებობს.
