პარლამენტის თავმჯდომარე დავით უსუფაშვილი უშიშროების საბჭოს სხდომაზე დასწრებას გეგმავს. როგორც ჟურნალისტებს უსუფაშვილმა განუცხადა, ყველამ უნდა იცოდეს, რომ კონსტიტუციური წესრიგი დასაცავია.
მისი თქმით, ამა თუ იმ პირის მიერ კონსტიტუციური უფლებამოსილებები შესასრულებელია და ყველა ცდილობს, ეს გააკეთოს. მათ შორის, თავად.
„ბოლო ცვლილებებით, ამ საბჭოში პარლამენტის თავმჯდომარეს ცოტა სხვა სტატუსი მიეცა. მანამდე, პარლამენტის თავმჯდომარეს უფლება ჰქონდა საბჭოს სხდომას თავისი შეხედულებისამებრ დასწრებოდა და არა - წევრის სტატუსით. ახალი ცვლილებებით, პარლამენტის თავმჯდომარე უშიშროების საბჭოს წევრია და უშიშროების საბჭოს სხდომის მოწვევის საკითხს წყვეტს არა პარლამენტის თავმჯდომარე, არამედ პრეზიდენტი. ამიტომ, როდესაც იგი ასეთი საბჭოს მოწვევას გადაწყვეტს, თუ მე რაიმე გადაუდებელი და შეუძლებელი წინააღმდეგობა არ მაქვს, მაშინ ამ საბჭოს უნდა დავესწრო. მე ასეც მოვიქცევი. კონკრეტულად 4 დეკემბრისთვის უცხოეთიდან დაბრუნებული ვიქნები. იმედია, მშვიდობით ჩამოვალ და საბჭოს დავესწრები კიდეც“, - განაცხადა უსუფაშვილმა.
პრეზიდენტ გიორგი მარგველაშვილმა პარიზში მომხადრ ტერორისტულ აქტებთან დაკავშირებით, 4 დეკემბერს უშიშროების საბჭოს სხდომა დანიშნა.
