საფრანგეთის საგარეო საქმეთა ყოფილი მინისტრი ბერნარდ კუშნერი ვარაუდობს, რომ ISIS-ის წინააღმდეგ ბრძოლა რუსეთთან ერთად, შესაძლოა თვეების და წლების მანძილზე გაგრძელდეს. დღეს გლობალური ალიანსის სამეთვალყურეო საბჭოს თავმჯდომარის რანგში საქართველოს სამედიცინო უნივერსიტეტის სტუდენტებთან შეხვედრისას მან განაცხადა, რომსაფრანგეთის და რუსეთის ერთად მოქმედების მიუხედავად, არ იზიარებს რუსეთის პოზიციას საქართველოში და უკრაინაში.
"იმისთვის, რომ ვიყოთ საკმარისად ეფექტურები, რომ ISIS-ს შევუტიოთ, ერთობლივი ძალისხმევა გვესაჭიროება. რაც შეეხება უკრაინაში, საქართველოში, რუსეთის როლს, რა თქმა უნდა, არ ვიზიარებ, მაგრამ სირიაში გადავწყვიტეთ ერთად გვემოქმედა. ეს ბრძოლა შესაძლოა თვეების და წლების განმავლობაშიც გაგრძელდეს, რათა აღკვეთილი იქნეს ფაშისტური შეტევა საფრანგეთზე”, - განაცხადა კუშნერმა.
მისივე თქმით, ISIS-ს რიგებში საბრძოლველად მიდიან მთელი ევროპიდან, მათ შორის საქართველოდანაც. კუშნერის ინფორმაციით, "ისლამურ სახელმწიფოში" ათასზე მეტი ფრანგი არის გაწევრიანებული.
