„სასწრაფო სამედიცინო დახმარების ცენტრის“ დირექტორის მოვალეობის შემსრულებლის, გიორგი ბუთხუზის ცნობით, პაციენტთა ჰოსპიტალიზაციის პროცესის ახლებურად დაგეგმვაზე მუშაობა მიმდინარეობს.
როგორც ჯანდაცვის კომიტეტის სხდომაზე ბუთხუზმა განაცხადა, მიზანი უნიფიცირებული ელექტრონული პროგრამის შექმნაა, სადაც სამედიცინო კლინიკების მიერ მიწოდებული სერვისები და ტერიტორიული სიახლოვის პრინციპიც აისახება.
მისი ცნობით, მუდმივად მიმდინარეობს რაიონული სამსახურების დატვირთვის ანალიზი და საჭიროების შემთხვევაში, დამატებითი პუნქტებიც გაიხსნება, ხოლო ბრიგადების საქმიანობის შეუფერხებლად განხორციელების მიზნით, თბილისის მერიის შესაბამის სამსახურებთან ინტენსიური კონტაქტია დამყარებული.
„სასწრაფო სამედიცინო ცენტრის მიერ ქრონიკული დაავადებების მქონე და პალიატიური მზრუნველობის ქვეშ მყოფი პაციენტების იდენტიფიცირება მოხდა, ასევე არსებობს შესაბამისი სია, რომელსაც მიზნობრივი პროექტების დაგეგმვისა და განხორციელების შემთხვევაში, ცენტრი თბილისის მერიას და ჯანდაცვის სამინისტროს გადასცემს“, - დასძენს ბუთხუზი.
