პარლამენტის რეგიონული პოლიტიკისა და თვითმმართველობის კომიტეტის თავმჯდომარის, ირაკლი ტრიპოლსკის განცხადებით, მარნეული-რუსთავის გზა არ უნდა მოხრეშილიყო და ის უნდა გაკეთებულიყო.
ინფრასტრუქტურული პროექტების შესრულებასთან დაკავშირებით, ტრიპოლსკიმ საკუთარი უკმაყოფილება კომიტეტის სხდომაზე დააფიქსირა, სადაც დეპუტატებმა რეგიონული განვითარების და ინფრაქტურქტიურის მინისტრის მოადგილეს თენგიზ შერგელაშვილს მოუსმინეს.
ტრიპოლსკის შეფასებით, ზოგჯერ ისე გამოდის, რომ არაფერი არ ჩერდება, მაგრამ არაფერი არ კეთდება.
„მოსახლეობა ხედავს, რომ არაფერი კეთდება. მარნეულიდან რუსთავისკენ მიმავალი გზა, რომელიც დროებით მოხრეშილია და ის ფული გადაყრილია, გზა არ უნდა მოხრეშილიყო და ის უნდა გაკეთებულიყო. აქ საუბარი არ არის იმაზე, რომ არაფერი კეთდება, საუბარი იმის შესახებაა, რომ გამოაცხადეთ, წყლის სისტემები 28 ქალაქში კეთდებოდა და ამის შემდეგ, პროექტები გადაკეთდა. რომ ამბობთ, რომ ეს ევროპული სტანდარტების გათვალისწინების გამო მოხდაო - ახლა ჩამოყალიბდა ევროპული სტანდარტი?! ახლა ევროპა ინგრევა, თორემ, ევროპული სტანდარტი დიდი ხანია ჩამოყალიბებულია და როცა პროექტს ხელს აწერდით, მაშინ არ იყო ევროპული სტანდარტი? - ეს მოსახლეობას არ აინტერესებს. მოსახლეობას იმას ხედვას, რომ რაღაც არ კეთდება. შეიძლება, დღევადნელი მაჩვენებელი უკეთესია, ვიდრე გუშინ იყო, მაგრამ მოსახლეობა ამას ვერ ხედავს, რადგან მასთან სასწრაფო, სახანძრო და ავტობუსი ვერ მიდის. მინდოდა, რომ როშკა-ახროტის გზაზე მადლობა გადამეხადა, მაგრამ ვატყობ, რომ ცოტა ხანში, ესეც გაჩერდება და მადლობის გადასახადი არაფერი მექნება“, - დასძინა ტრიპოლსკიმ.
ტრიპოლსკის პოზიციას შერგელაშვილი გამოეხმაურა და მან უკმაყოფილება გამოხატა, რის გამოც, მას დეპუტატმა საკუთარ კაბინეტში ჩასვლა და იმ ინფორმაციის მიწოდება შესთავაზა, რომელსაც სხდომაზე საჯაროდ არ გაახმოვანებდა.
