პარლამენტის თავდაცვის კომიტეტის თავმჯდომარე ირაკლი სესიაშვილსა და ნატოს ქვეყნების სამხედრო ატაშეებს შორის გამართულ შეხვედრაზე საუბარი ტერორისტულ აქტებსაც შეეხო.
როგორც ჟურნალისტებს შეხვედრის დასრულების შემდეგ სესიაშვილმა განუცხადა, პარიზში განხორციელებული ტერაქტის ფონზე, ყველა ქვეყანაში კითხვა ისმება, რა მდგომარეობაა ამ სახელმწიფოში და სახელმწიფოს რამდენად შეუძლია ტერორიზმის პრევენცია მოახდინოს.
„ეს კითხვა ჩვენს დარბაზშიც დაისვა. შევძელი მხოლოდ ზოგადი პასუხი გამეცა, რამდენადაც არ მაქვს უფლება დეტალებზე ვისაუბრო. პრემიერმა გადაწყვეტილება მიიღო, რომ შესაბამისი რეჟიმები მაქსიმალურად გავამკაცროთ იმისათვის, რომ ჩვენი მოქალაქეების დაცვა მოვახდონოთ. უსაფრთხოების სამსახურები სიტუაციას აკონტროლებენ და მოწყვლადი ჯგუფები მაქსიმალურად დაკვირვების ქვეშ არიან. ასევე გაძლიერებულ რეჟიმში ხდება საზღვრის დაცვა. ასევე დავგეგმეთ, რომ რიგი მიმართულებებით დამატებით ტექნიკური საშუალებებები შემოვიტანოთ“, - განაცხადა სესიაშვილმა.
