"დიდი ოცეულის" სამიტზე ევროპული საბჭოს თავმჯდომარემ, დონალდ ტუსკმა განაცხადა, რომ "ისლამურ სახელმწიფოს" წინააღმდეგ საბრძოლველად, აუცილებელია კოლექტიური მოქმედებები.
მისი თქმით, აშშ-სა და რუსეთს შორის თანამშრომლობას ამ საკითხში, კრიტიკული მნიშვნელობა გააჩნია.
"უეჭველად, ამ სფეროში აშშ-სა და რუსეთს შორის თანამშრომლობას კრიტიკული მნიშვნელობა გააჩნია. თუმცა მხოლოდ თანამშრომლობა საკმარისი არ არის. ვფიქრობ, რუსეთის ქმედებები სირიაში უნდა იყოს უმეტესწილად "ისლამური სახელმწიფოს" წინააღმდეგ მიმართული", - განმარტა ტუსკმა.
ორდღიანი საერთაშორისო ფორუმი ანტალიის სიახლოვეს მდებარე საკურორტო ქალაქ ბელეკში უსაფრთხოების უპრეცედენტო ზომების ფონზე მიმდინარეობს.
ადგილობრივი მედიის ცნობით, ბელეკში მობილიზებულია ათასობით სამხედრო და სამართალდამცველი, ქალაქში შეწყვეტილია კერძო და მუნიციპალური ტრანსპორტის გადაადგილება, დაიკეტა ქალაქის ყველა შესავლელი, დაიხურა სასტუმროების ნაწილი.
მგზავრებს ანტალიის საერთაშორისო აეროპორტის მხოლოდ მეორე ტერმინალი ემსახურება, პირველი ტერმინალი კი, სამიტის სტუმრებისთვის არის გაკუთვნილი. აეროპორტის მიმდებარე ტერიტორიას პოლიცია იცავს, გზებზე ბლოკპოსტები გაიხსნა, სამართალდამცველები კურორტისკენ მიმავალ ავტომობილებს ამოწმებენ. 9 ნოემბრიდან 18 ნოემბრის ჩათვლით ანტალიაში მიტინგების, დემონსტრაციების, გაფიცვებისა და სხვა სახის აქციების გამართვა აიკრძალა. სანაპირო ზოლში 24-საათიანი პატრულირება განხორციელდება.
როგორც თურქული მედია იტყობინება, სამიტის ორგანიზებისთვის თურქეთმა დაახლოებით 100 მილიონი აშშ დოლარი გამოყო.
საერთაშორისო ფორუმს აშშ-ის და რუსეთის პრეზიდენტები, გერმანიის კანცლერი და სხვა ლიდერები, ასევე გაეროს გენერალური მდივანი, მსოფლიო სავალუტო ფონდის პრეზიდენტი, ასევე მსოფლიო ბანკისა და სხვა საერთაშორისო ორგანიზაციების ხელმძღვანელები დაესწრებიან.
