პარლამენტის ჯანდაცვისა და სოციალურ საკითხთა კომიტეტის თავმჯდომარე დიმიტრი ხუნდაძემ მთავრობის ადმინისტრაციასთან მოშიმშილეები მოინახულა. პარლამენტის ინფორმაციით, დეპუტატმა თითოეული მათგანის ჯანმრთელობის შესახებ ინფორმაცია მოისმინა.
"მე აქ მოვედი ჩემი თანამდებობრივი და პროფესიული ვალის მოსახდელად, რადგან გახლავართ საქართველოს ყველა მოქალაქის ჯანდაცვის კომიტეტის თავმჯდომარე, მიუხედავად მათი პოლიტიკური შეხედულებისა. უკვე მეექვსე დღეა მოქალაქეები შიმშილობენ და შეიძლება მათ ჯანმრთელობას გართულება მოჰყვეს. მითუმეტეს მაშინ, როდესაც ჩვენთვის ყველასთვის პატივსაცემ პიროვნებას, ლევან თედიაშვილს შაქრიანი დიაბეტი აქვს, ერთ მოქალაქეს კი მაღალი ტემპერატურა. მოშიმშილეების ჯანმრთელობა გარემო კლიმატის გათვალისწინებით საყურადღებოა. აქ სწორედ იმიტომ მოვედი, რომ თავად მომენახულებინა ისინი და პირადად მიმეღო ინფორმაცია მათი ჯანმრთელობის შესახებ", - განაცხადა ხუნდაძემ.
მისივე თქმით, არსებული ვითარებიდან გამომდინარე, ქალაქის მერ დავით ნარმანისთან შეთანხმებით, მიიღო გადაწყვეტილება, რომ სასწრაფო სამედიცინო დახმარების ბრიგადები მუდმივად იქნებიან მათთან და მოშიმშილეებს ექიმები არ დატოვებენ.
"კიდევ ერთხელ ვაცხადებ, ჩვენი მთავარი საზრუნავია ჩვენი მოქალაქეების ჯანმრთელობა და ყველაფერს გავაკეთებთ მათი ჯანმრთელობის დასაცავად",- განმარტა დიმიტრი ხუნდაძემ.