ყოფილი პრემიერი "რუსთავი 2"-ის გარშემო განვითარებული მოვლენების გამო ვაშინგტონის შეშფოთებასთან დაკავშირებით აცხადებს, რომ შეფასება გადაჭარბებულია და მტავრობა ყველანაირად ცდილობს აშშ დაარწმუნოს თავის გულწრფელობაში.
,,რა თქმა უნდა, ანგარიშს ვუწევთ ამერიკის შეერთებული შტატების შეშფოთებას. ის არის მთავარი სტრატეგიული პარტნიორი და ყველანაირად ვცდილობთ, დავარწმუნოთ ჩვენს გულწრფელობაში. მე ვფიქრობ, შეშფოთება არის გადაჭარბებული. საფუძველი ამის კი გახლავთ ისევ "ნაციონალური მოძრაობა", რომელიც 9 წლის განმავლობაში ახერხებდა უამრავი მეგობრის შეძენას, თავისი ხელწერის – დიქტატურის ნაცვლად დემოკრატიად გაფორმებას და ა.შ. მე ამას გულწრფელად ვიღებ ყურადღებით. ვალდებულადაც კი ვთვლი თავს და დღევანდელ ხელისუფლებასაც ვფიქრობ იგივე ვალდებულება აქვს, რომ ჩვენ ყველა კითხვას ვუპასუხოთ. ვუპასუხებთ კიდეც და ვაჩვენებთ რეალობას, რომ არაფერიც არ ხდება. მარტივი თემაა ხალხო – "მაესტრო" გაქვთ გვერდით, თანაც "მაესტროში" გაცილებით ჯანსაღი პროცესია - იქ დაობენ მესაკუთრეები, აქ კი დაობს ორი მესაკუთრე, რომელიც ორჯერ გაძარცვეს და გაუგებარი კაცი "ნაციონალურ მოძრაობასთან" ერთად", - განაცხადა ივანიშვილმა.
რაც შეეხება კითხვას, რამდენად შეიძლება კონკრეტული პოლიტიკური შედეგი უშუალოდ მასაც შეეხოს, ბიძინა ივანიშვილმა აღნიშნა, რომ მას არაფერი შეეხება, რადგან კანონი არ დაურღვევია. ,,როგორც არ უნდა ინატროთ, ვერაფერი ვერ შემეხება მე, რადგან განსხვავებით იმ ადამიანებისგან, ვისაც თქვენ იცავთ, კანონს არ ვარღვევ", - მიმართა ივანიშვილმა კითხვის ავტორს.
