,,ქალებისა და კაცების თანასწორობა ჩემთვის არასოდეს დამდგარა კითხვის ნიშნის ქვეშ, პირადად მე ამ ტრადიციებით გავიზარდე”, - ამის შესახებ საქართველოს პრემიერ-მინისტრმა სასტუმრო „რედისონში“ მიმდინარე საერთაშორისო კონფერენციაზე „გენდერული თანასწორებისკენ - გამოწვევები და შესაძლებლობები ევროპული სამეზობლო პოლიტიკის რეგიონში“ სიტყვით გამოსვლისას განაცხადა.
მისი თქმით, არ არსებობს გარემოება, რომელიც ქალთა მიმართ ძალადობას ამართლებდეს.
„მინდა მოგახსენოთ, რომ ქალებისა და კაცების თანასწორობა ჩემთვის არასოდეს დამდგარა კითხვის ნიშნის ქვეშ, პირადად მე ამ ტრადიციებით გავიზარდე. მეგობრებო, თქვენ იმყოფებით ქვეყანაში, რომლის ყველაზე დიდმა მოაზროვნემ ჯერ კიდევ მე-12 საუკუნეში თქვა, რომ ქალი და კაცი თანასწორია. ამიტომაც არის ჩემთვის ძალიან მტკივნეული ქალების მიმართ ის დისკრიმინაცია და ის ძალადობა, რომლებსაც თითქმის ყოველდღიურად ვაწყდებით მთელი მსოფლიოს მასშტაბით. და არ არსებობს გარემოება, რომლითაც შეიძლება ამის გამართლება. სწორედ ამიტომ, ჩვენ ყველანი, კაცებიც და ქალებიც, თანასწორობის მხარეს უნდა ვიდგეთ, რათა ყველა ადამიანს დედამიწაზე მიეცეს თანაბარი და თავისუფალი განვითარების შესაძლებლობა.
ნამდვილად ძნელად წარმოსადგენია, რომ ჩვენ ვცხოვრობთ მსოფლიოში, სადაც გაეროს მხოლოდ წლევანდელი მონაცემებით 39 მილიონ გოგონას არ მიეცა სასკოლო განათლების საშუალება, 774 მილიონი ზრდასრული ქალის ორ მესამედს ასევე არ მიეცა განათლების საშუალება. მოდით, დავფიქრდეთ, რამ გამოიწვია ის, რომ მსოფლიოში ღარიბი მოსახლეობის 70 პროცენტი ქალია. როგორ უნდა ვიცხოვროთ ისეთ სამყაროში, სადაც ყოველი სამი ქალიდან ერთი განიცდის ძალადობას გენდერული ნიშნით და ძალიან ცოტაა ისეთი ქალი, რომელსაც შესწევს უნარი იბრძოლოს და შეცვალოს არსებული რეალობა.
პეკინის მოქმედებათა პლატფორმის 20 წლის მიმოხილვის თანახმად, მიუხედავად იმისა, რომ პროგრესი ძალიან ნელია,წინსვლა არის და პრობლემა ნაბიჯ-ნაბიჯ, მაგრამ მაინც თანდათანობით მცირდება. დარწმუნებული ვარ, რომ გენდერული თანასწორობისა და ქალთა და გოგონათა უფლებების დაცვით, აგრეთვე გაზრდილი ინფორმირებულობისა და აქტიური მხარდაჭერის წყალობით,პროგრესი უფრო საგრძნობი გახდება“, აღნიშნა პრემიერმა.
