საგარეო საქმეთა ყოფილი მინისტრი თამარ ბერუჩაშვილი საპარტნიორო ფონდში დასაქმდა. ფონდის ხელმძღვანელმა დავით საგანელიძემ ამის შესახებ ჟურნალისტებთან განაცხადა.
მისი თმით, ყოფილი საგარეო საქმეთა მინისტრის წარდგენა სხვადასხვა უცხოურ საფინანსო ინტიტუტებთან, ფონდისთვის მომგებიანი იქნება.
,,ფონდში შეიქმნა უცხოურ საფინანსო ინსტიტუტებთან ურთიერთობის სამუშაო ჯგუფი, რომელიც სამი თვის განმავლობაში იმუშავებს ფონდის რეფორმირებაზე. ჯგუფის წევრები არიან თამარ ბერუჩაშვილი, რომელიც წლების განმავლობაში მუშაობდა მსოფლიო ბანკსა და სავალუტო ფონდთან – მე ასეთი "ფეისები" მჭირდება: ის, რომ საგარეო უწყების ყოფილი ხელმძღვანელი უცხოელებთან სამუშაო სიტუაციაში საუბრობს საპარტნიორო ფონდის სახელით, საქმეს წაადგება. ჯგუფის წევრები არიან ასევე, მირიან გოგიაშვილი, რომელიც 8 წელი მსოფლიო ბანკის თანამშრომელი, 3 თუ 4 წელი საქართველოში "იბიარდის" ექსპერტი და ფინანსთა მინისტრი იყო და მერაბ კაკულია, რომელსაც წლების განმავლობაში ბანკის ვიცე-პრეზიდენტის თანამდებობა ეკავა და ამ დარგის ერთ-ერთ საუკეთესო ექსპერტად ითვლება. ასეთი ადამიანები მჭირდება", - აღნიშნა საგანელიძემ, რომელიც ბორჯომში, სასტუმრო "რიქსოსში" მედიის წარმომადგენლებს ფონდის პროექტებს აცნობს.
