„ახლა უფრო, ვიდრე ოდესმე, საერთაშორისო თანამეგობრობას აქვს უნიკალური შესაძლებლობა გადადგას გადამწყვეტი ნაბიჯები გენდერული თანასწორობისკენ“- აცხადებს ესტონეთის რესპუბლიკის საგარეო საქმეთა მინისტრი, მარია კალიურანდი, რომელიც ა.წ. 10 ნოემბერს თბილისს ეწვევა და მონაწილეობას მიიღებს მაღალი დონის საერთაშორისო კონფერენციაში „გენდერული თანასწორობისკენ - გამოწვევები და შესაძლებლობები ევროპული სამეზობლო პოლიტიკის რეგიონში“.
ესტონეთის საგარეო საქმეთა მინისტრი აცხადებს, რომ გენდერული თანასწორობის მიღწევა და ქალთა უფლებამოსილების გაზრდა წარმოადგენს ერთ-ერთ მთავარ მიზანს 2030 წლის დღის წესრიგში. თუმცა, პირველ რიგში, თითოეული ქვეყნის ამოცანაა თავად გარდაქმნას ამ საკითხთან დაკავშირებული დაპირებები მოქმედებაში .
მარია კალიურანის თქმით, ესტონეთი ამზადებს გენდერული თანასწორობის პოლიტიკის პირველ სამოქმედოგეგმას, რომლის მიზანიცაა დაირღვეს გენდერის შესახებ ნეგატიური სტერეოტიპები, შეიქმნას თანაბარი ეკონომიკური დამოუკიდებლობა, დაბალანსებული მონაწილეობა ყველა დონის გადაწყვეტილების მიღებასა და მართვაში. “ესტონეთი უდიდეს მნიშვნელობას ანიჭებს ქალთა უფლებებს, გენდერულ თანასწორობას და ცდილობს ქალებისთვის მაქსიმალურად ხელმისაწვდომი გახადოს მაღალი დონის განათლების მიღება, ასევე გახსნას მათთვის ახალი შესაძლებლობები ინფორმაციისა და კომუნიკაციის სფეროში”-აცხადებს მარია კალიურანდი.
მაღალი დონის საერთაშორისო კონფერენციაში „ გენდერული თანასწორობისკენ - გამოწვევები და შესაძლებლობები ევროპული სამეზობლო პოლიტიკის რეგიონში “ გაიმართება თბილისში ა.წ. 10 ნომბერს. მასში 250-მდე სტუმარი და 20-მდე მაღალი დონის გამომსვლელი მიიღებს მონაწილეობას. კონფერენციას საქართველოს პრემიერ-მინისტრი ირაკლი ღარიბაშვილი და ევროკავშირის უმაღლესი წარმომადგენელი ფედერიკა მოგერინი გახსნიან. ღონისძიება იმართება საქართველოს მთავრობის ინიციატივით ევროკავშირსა და გაეროსთან თანამშრომლობით.
