მე ვთვლი, რომ დემოკრატიულ და ცივილიზებულ სამყაროში არ არის ისეთი პოლიტიკოსის ადგილი, რომელიც აქეზებს თავისი პარტიის წევრებსა და ტელევიზიის დირექტორებს, შექმნან კრიმინალური დაჯგუფებები და მოახდინონ რევოლუცია და სახელმწიფო გადატრიალება,-ამის შესახებ პრემიერ-მინისტრმა ირაკლი ღარიბაშვილმა თემის კომენტირებისას განაცხადა.
საქართველოს მთავრობის მეთაურმა ესტონეთის პრემიერ-მინისტრთან ერთად დღეს პრესკონფერენცია გამართა და ჟურნალისტების შეკითხვებს უპასუხა.
მისი განმარტებით, იმ ადამიანის ადგილი, რომელიც სახელმწიფო გადატრიალებას და ქვეყანაში არეულობის დათესვას ცდილობს, ციხეშია.
“ასეთი პირის ადგილი, არა აქვს მნიშვნელობა, ვინც არ უნდა იყოს ის, იქნება ეს პოლიტიკოსი თუ ჟურნალისტი, არის ციხეში. თქვენი ინფორმირებისთვის, მინდა გითხრათ, რომ რამდენიმე დღის წინ გავრცელდა ბატონი სააკაშვილის და მისი პარტიის წევრების რამდენიმე აუდიოჩანაწერი, სადაც ისინი საუბრობენ რევოლუციაზე და სახელმწიფო გადატრიალებაზე საქართველოში. მე ვიტყოდი, ეს არის მისი ოცნება. დღეს საქართველო არის ძლიერი, დემოკრატიული და სტაბილური ქვეყანა, ჩვენ ვაგრძელებთ ევროპული ოჯახისკენ სწრაფვას, იმისათვის, რომ გავხდეთ ევროკავშირისა და ნატოს წევრი,”-აღნიშნა პრემიერმა.
