იუსტიციის სახლში, თეა წულუკიანის ხელმძღვანელობით, თავისუფალი და სამართლიანი არჩევნებისთვის უწყებათაშორისი კომისიის სხდომა გაიმართა. 
იუსტიციის სამინისტროს ინფორმაციით, სხდომის მუშაობაში კვალიფიციური საარჩევნო სუბიექტების, სხვა პოლიტიკური პარტიებისა და საარჩევნო ბლოკების, ადგილობრივი და საერთაშორისო დამკვირვებელი ორგანიზაციების, ცენტრალური საარჩევნო კომისიის წარმომადგენლები მონაწილეობდნენ. უწყებათაშორისი კომისიის თავმჯდომარემ შუალედური არჩევნების მიმდინარეობა შეაფასა. 
თეა წულუკიანის ინიციატივით, უწყებათაშორისმა კომისიამ მიიღო რეკომენდაცია, რომლის თანახმადაც, სპეცუბნებთან დაკავშირებით ცვლილებები შევა კანონმდებლობაში. კერძოდ, შეიქმნება სპეციალური სამუშაო ჯგუფი, რომელიც ამ საკანონმდებლო ინიციატივაზე იმუშავებს. ჯგუფს თავდაცვის მინისტრის მოადგილე ბესიკ ლოლაძე (რომელიც თავისუფალი და სამართლიანი არჩევნების უწყებათაშორისი კომისიის წევრია) უხელმძღვანელებს. კომისიაში შევლენ შინაგან საქმეთა, სასჯელაღსრულების, თავდაცვის, იუსტიციის სამინისტროების, საქართველოს ახალგაზრდა იურისტთა ასოციაციის, "სამართლიანი არჩევნების" და სახალხო დამცველის წარმომადგენლები, ასევე, დეპუტატები პარლამენტიდან. 
თავისუფალი და სამართლიანი არჩევნებისთვის უწყებათაშორისი კომისია იუსტიციის მინისტრის 2015 წლის 1 სექტემბრის ბრძანებით შეიქმნა. მისი მიზანი 2015 წლის საქართველოს პარლამენტისა და საკრებულოს შუალედური არჩევნების დროს საჯარო მოსამსახურეების მხრიდან საარჩევნო კანონმდებლობის დარღვევის პრევენცია და გამოვლენილ დარღვევებზე რეაგირება იყო, რამაც შუალედური არჩევნებისთვის ხელი შეუწყო თავისუფალი და სამართლიანი საარჩევნო გარემოს შექმნას. კომისია საქმიანობას ცესკო-ს მიერ არჩევნების საბოლოო შედეგების ოფიციალურად გამოქვეყნების დღიდან შეწყვეტს.