"თავისუფალმა დემოკრატებმა" ნაძალადევის რაიონის სადამფუძნებლო ყრილობა გამართეს. ყრილობა სასტუმრო "შაინში" გაიმართა. დღევანდელ ყრილობაზე რაიონული ორგანიზაციის წევრებმა აირჩიეს გამგეობის წევრები, გამგეობის წევრებმა კი უკვე ნაძალადევის რაიონული ორგანიზაციის ხელმძღვანელად პაატა ქათამაძე წარადგინეს.
როგორც ჟურნალისტებს პარტიის ლიდერმა ირაკლი ალასანიამ განუცხადა, განსაკუთრებული მნიშვნელობა აქვს ნაძალადევში ძლიერი სტრუქტურის და ორგანიზაციის ჩამოყალიბებას.
"თითოეულ ამომრჩეველთან უნდა მივიდეთ და გავაცნოთ ჩვენი ეკონომიკური პროგრამა. მთელი ჩვენი პლატფორმა აგებულია სწორედ ეკონომიკის გაჯანსაღებაზე. დასაქმების პროგრამები, ეკონომიკის განვითარება, ინვესტიციების მოზიდვა, რა სექტორის ხელშეწყობა მოხდება, სწორედ ამ მიმართულებით ჩვენი ხედვები იქნება ის ძირითადი საკითხები, რის გამოც ხალხი დაიჯერებს, რომ ჩვენს ქვეყანას აქვს ეკონომიკური მომავალი", - განაცხადა ირაკლი ალასანიამ.
ნაძალადევის რაიონული ორგანიზაციის თავმჯდომარის, პაატა ქათამაძის თქმით, რაიონული ორგანიზაციის ფორმირება დასრულებულია, თუმცა ორგანიზაციას აქვს სხვადასხვა გეგმები.
"ჩვენი გეგმები არის ხალხთან ყოველდღიური და ყოველწამიერი ურთიერთობა, რაიონული პრობლემების აღრიცხვა, სამწუხაროდ, ეს პრობლემები ბევრია, თუმცა ჩვენ დავგეგმავთ ამ პრობლემების გადაჭრის გზებს და ამომრჩეველს წარვუდგენთ ჩვენს მიერ დასახულ გეგმებს", - განაცხადა ქათამაძემ.
