შერიგებისა და სამოქალაქო თანასწორობის საკითხებში სახელმწიფო მინისტრი პაატა ზაქარეიშვილი გამორიცხავს, რომ რუსეთმა საქართველოს ტერიტორიული მთლიანობა ნატოსა და ევროკავშირზე უარის თქმის სანაცვლოდ აღადგინოს.
პარლამენტის ტერიტორიული მთლიანობის აღდგენის დროებითი კომისიის დღევანდელ სხდომაზე, ქვეყნის საგარეო მიმართულებაზე ზაქარეიშვილმა მას შემდეგ ისაუბრა, რაც ოპოზიციონერმა დეპუტატმა, გია გაჩეჩილაძემ განაცხადა, რომ არსებობს მოსაზრება, რომ თუკი საქართველო ნატო–სა და ევროკავშირზე უარს იტყვის, რუსეთი ქვეყნის ტერიტორიულ მთლიანობას აღადგენს.
„ეს გამორიცხულია. ამ პოზიციაზე უკვე ვიყავით, როცა ედუარდ შევარდნაძემ ომის შემდეგ შემოგვთავაზა, დსთ–ში შევიდეთ და აფხაზეთსა და სამხერთ ოსეთში პრობლემები მოგვარდებაო. ყველაფერი პირიქით მოხდა. პირველ რიგში მნიშვნელობა ღირებულებებს აქვს. ნატო–ს წევრი ქვეყნის ღირებულებები - დემოკრატიული ღირებულებებია. ამიტომ ჩემთვის ამ მიმართულებით მოძრაობა მნიშვნელოვანია. რაც ნატო არსებობს, საომარი მოქმედებები ნატო–ს არცერთ ქვეყანაში არ ყოფილა და დსთ–ში რა ხდება, კი ხედავთ“, - განაცხადა ზაქარეიშვილმა.
