პარლამენტის თავმჯდომარე დავით უსუფაშვილი ინტერესდება, ტელეკომპანია „რუსთავი 2“-ის ოფიციალური მეპატრონეები - ძმები ყარამანაშვილები საკუთარ ქონებასთან დაკავშირებით, რატომ არ საუბრობენ.
როგორც ჟურნალისტებს უსუფაშვილმა განუცხადა, პირველ რიგში, მას ის აოცებს, რომ ამ თემაზე იმ ხალხის გარდა ყველა საუბრობს, ვისაც ეს საკითხი ეხება.
„კონკრეტულად ამ არხის მეპატრონეებს ვგულისხმობ. მათი კომპანიის თუ ქონების თაობაზე დავაა და მას ვიღაცეები იცავენ, ვიღაცეები ბარიკადების აშენებას აპირებენ და პოზიციებს სხავაინაირდ გამოხატავენ. პირველ რიგში ის მაინტერესებს, ეს ხალხი ბუნებაში არსებობს თუ არა, ისინი რეალურად ტელევიზიის პატრონები არიან თუ არა და უარი აქვთ თუ არა ნათქვამი? - თუ ასეა, სამართლებრივადაც და პოლიტიკურადაც სხვა სურათი და ვითარება გვექნება. ტელევიზიის თაობაზე ყველა რაღაცას ცდილობს, იმ ხალხის გარდა, ვისაც ეს ეხება. ამ ყველაფერში ყველაზე საინტერესო ესაა. ამ პროცესიდან ვინ რა სარგებელის გამონახვას ცდილობს, ეს სხვა თემაა და კიდევ სხვა თემაა შესაძლო კანონდარღვევებიც, რომელიც შეიძლება გამოიხატოს, ან არა, მაგრამ ეს სამართალდამცავების საქმეა“, - დასძინა უსუფაშვილმა.
