აშშ-ში ვიზიტის ფარგლებში საქართველოს ვიცე-პრემიერი, საგარეო საქმეთა მინისტრი გიორგი კვირიკაშვილი ატლანტიკურ საბჭოში სიტყვით გამოვიდა, სადაც საქართველოს ევრო-ატლანტიკური ინტეგრაციის აუცილებლობაზე, რუსეთის აგრესიულ პოლიტაკასა და საქართველოს ეკონომიკის განვითარებაზე ისაუბრა.
„ევრო-ატლანტიკური ინტეგრაცია კვლავ საქართველოს საგარეო პოლიტიკის უმთავრეს პრიორიტეტად რჩება. მტკიცედ გვწამს, რომ ამერიკის შეერთებულ შტატებთან სტრატეგიული პარტნიორობა და ნატოში გაწევრიანება ერთადერთი გზაა ჩვენი ქვეყნის უსაფრთხოებისა და რეგიონული მშვიდობის მისაღწევად. ჩვენ დავამტკიცეთ, რომ როგორც პოლიტიკურად, ისე ტექნიკურად, მზად ვართ ნატოში ინტეგრაციის მომდევნო ეტაპზე გადასასვლელად, ახლა კი სიტყვა დასავლეთზეა“ - განაცხადა გიორგი კვირიკაშვილმა.
მინისტრის თქმით, საქართველოსა და უკრაინის წინააღმდეგ რუსეთის აგრესიამ განსაკუთრებული საფრთხე შეუქმნა რეგიონში უსაფრთხოებისა და დემოკრატიული ღირებულებების არსებობას. არსებული კონფლიქტების გადაწყვეტა შეუძლებელია დასავლეთის მხრიდან აქტიური პოლიტიკური და დიპლომატიური ჩართულობის გარეშე.
„საქართველოს მთავრობა გამუდმებით დგამს ნაბიჯებს იმისათვის, რომ მიაღწიოს რუსეთის მხრიდან 2008 წლის აგვისტოს შეთანხმებით ნაკისრი ვალდებულებების შესრულებასა და საქართველოს ოკუპირებული ტერიტორიებიდან რუსული ჯარების გაყვანას. ჩვენ ვაწარმოებთ რუსეთის მხარესთან მოლაპარაკებებს როგორც ჟენევის ფორმატში, ისე პრემიერ-მინისტრის სპეციალური წარმომადგენლის მეშვეობით; შემოვიღეთ უვიზო რეჟიმი რუსი მოქალაქეებისთვის. მიუხედავად ჩვენი ძალისხმევისა, რუსეთის ხელისუფლებამ კიდევ უფრო მეტი ტერიტორია მიიტაცა, იქ მავთულხლართები აღმართა და აფხაზეთისა და სამხრეთ ოსეთის საოკუპაციო რეჟიმებთან ე.წ. პარტნიორობის შეთანხმებები გააფორმა, რაც მცოცავი ანექსიის მიზნებს ემსახურება. მიუხედავად ამისა, საქართველოს მთავრობა კვლავ სტრატეგიული მოთმინების პოლიტიკის ერთგულია“ - განაცხადა საქართველოს ვიცე-პრემიერმა.
გიორგი კვირიკაშვილის თქმით, რუსულმა ოკუპაციამ სარგებელი ვერც აფხაზურ და ოსურ უმცირესობებს მოუტანა. აქედან გამომდინარე, საქართველოს ხელისუფლების მთავარი ამოცანა აფხაზ და ოსურ მოსახლეობასთან ნდობის აღდგენა და დემოკრატიული და დამოუკიდებელი სახელმწიფოს მათთან ერთად შენებაა.
საქართველოს საგარეო საქმეთა მინისტრი თავის გამოსვლაში საქართველოს მთავრობის მიერ გატარებულ დემოკრატიულ რეფორმებსაც შეეხო, კერძოდ, მან კორუფციის აღმოფხვრის, ხელისუფლების დეცენტრალიზაციის, სასამართლოების დამოუკიდებლობის გაძლიერების, პენიტენციური სისტემის რეფორმირების, ადამიანის უფლებათა დაცვისა და დისკრიმინაციის ყველა ფორმის აღმოფხვრის მიმართულებით გადადგმული ნაბიჯების შესახებ ისაუბრა.
გამოსვლაში ვრცელი ადგილი დაეთმო საქართველოს ეკონომიკური განვითარების საკითხებს, კერძოდ ინვესტიციების მოზიდვის, ეკონომიკური ზრდის ხელშეწყობის, კერძო სექტორის განვითარების აუცილებლობას. გიორგი კვირიკაშვილმა ჩინეთთან და ამერიკის შეერთებულ შტატებთან თავისუფალი ვაჭრობის შეთანხმებების გაფორმების პერსპექტივებზეც ისაუბრა, რაც საქართველოს ახალი ბაზრების ათვისების შესაძლებლობას მისცემს.
„ჩვენი მიზანია საქართველო წარმატებულ ქვეყნად ვაქციოთ, რომელიც შესძლებს თავისი უნიკალური გეოგრაფიული მდებარეობის გამოყენებას და აზიისა და ევროპის დამაკავშირებელ სასიცოცხლო მნიშვნელობის ცენტრად იქცევა“ -განაცხადა გიორგი კვირიკაშვილმა.
