ნატო-სა და ევროკავშირის მხარდამჭერთა შემცირების მიზეზი საზოგადოების რეალისტური დამოკიდებულებაა, - ამის შესახებ საქართველოს პრეზიდენტმა დიპლომატებსა და არასამთავრობო ორგანიზაციების წარმომადგენლებთან შეხვედრაზე, დასმულ შეკითხვაზე საპასუხოდ განაცხადა.
გიორგი მარგველაშვილის განმარტებით, საზოგადოების ნაწილზე უარყოფითად აისახება ის შენელებული პროცესი, რომელსაც აღნიშნული მიმართულებებით ვხედავთ.
"აქ ძალიან მნიშვნელოვანია ის პარამეტრი, რომ არ არის მატება საპირისპირო - ევრაზიული კავშირის მხარამჭერთა რაოდენობაში. რაც შეეხება კვლევის იმ ნაწილს, რომელშიც ვამჩნევთ ნატო-სა და ევროკავშირის მიმართულებით კლებას, ჩემი აზრით, ეს არ გულისხმობს ღირებულებით ცვლილებას. ეს უბრალოდ საზოგადოების რეალისტური დამოკიდებულებაა, რომელიც გამომდინარეობს იმ შენელებული პროცესიდან, რომელსაც ჩვენ ვხედავთ", - განაცხადა პრეზიდენტმა.
მისივე თქმით, გამოსავალი იმაში მდგომარეობს, რომ საზოგადოების ნაწილმა, ევროპული ორიენტაციის პოპულარიზაცია საკუთარ თავზე უნდა აიღოს.
,,საზოგადოებამ, რომელსაც სჯერა მიმართულების და იმის, რომ ეს უცვლელი ღირებულებებია და ამისკენ უნდა ვიაროთ, თავის თავზე უნდა აიღოს ევროპული იდეების პოპულარიზაცია და იმუშაოს იმისთვის, რომ შედეგები იყოს განსხვავებული. ჩვენ რეალურად ვხედავთ, რომ ამ კურსის მხარდამჭერებმა დავკარგეთ მნიშვნელოვანი ნაწილი, რომელსაც ჩვენთან ერთად სჯერა, რომ ეს კარგია. მე არ ვფიქრობ, რომ მათ ამის არ სჯერათ. აქ არ არის კამათი იმის თაობაზე, ეს კარგია თუ ცუდი, მესიჯი მდგომარეობს შემდეგში - ეს არარეალურია. ბუნებრივია, რუსეთის პროპაგანდას თავისი შედეგები მოყვება. რა უნდა ვაკეთოთ?- ჩვენც იგივე უნდა განვახორციელოთ - რაც შეიძლება მეტად ჩავერთოთ პროცესში", - დასძინა პრეზიდენტმა.
