კახი კალაძესა და გაზპრომს შორის მოლაპარაკებებზე შეფასებები პარლამენტში გაკეთდა. უმრავლესობის წევრები აცხადებენ, რომ ენერგეტიკის მინისტრი მოლაპარაკებებს აწარმოებს არა იმისთვის, რომ საფრთხე შეექმნას ქვეყნის ენერგო დამოუკიდებლობას, არამედ პირიქით, რომ მოხდეს ქვეყანაში ენერგო დივერსიფიცირება.
"საფრთხე არავითარ შემთხვევაში არაფრისგან არ არის. მილში მილიონი კუბამეტრი გაივლის თუ ნახევარი მილიონი საფრთხეს ამაში ვერ ვხედავ. აზერბაიჯანი ჩვენი სტრატეგიული პარტნიორია, მეგობარი ქვეყანაა, განსხვავებით სხვა ქვეყნისაგან, მაგრამ თავად აზერბაიჯანი ყიდულობს გაზპრომისგან გაზს," - აცხადებს ფრაქცია ქართული ოცნება - მრეწველების მდივანი ზურაბ ტყემალაძე.
როგორც ფრაქცია ქართული ოცნების წევრი თამაზ მეჭიაური აცხადებს, რაც მეტი მომწოდებელი ეყოლება ქვეყანას, მით უფრო ვიქნებით დაზღვეული რომელიმე ქვეყნის დიქტატისგან, რომ გამოიყენოს ეს გაზი თუნდაც თავისი პოლიტიკური მიზნებისთვის შენი მიზნების საწინააღმდეგოდ. ის ასევე, მიესალმება, თუ იქნება კიდევ ახლი მომწოდებელი, მაგალითად ირანი.
