„რუსთავი 2“-ის გენერალური დირექტორი ნიკა გვარამია საქართველოს პარლამენტის თავმჯდომარეს დავით უსუფაშვილს მოუწოდებს, „რუსთავი 2“-ის გარშემო განვითარებული მოვლენებით დაინტერესდეს.
საგანგებო ბრიფინგზე გვარამიამ განაცხადა, რომ უსუფაშვილი მათი ამბებით არც დაინტერესებულა.
„მინდა, მოვუწოდო საქართველოს პარლამენტის თავმჯდომარეს, რომელიც სამწუხაროდ, ჯერჯერობით, არცერთი შეკითხვით არ ყოფილა წარმოდგენილი ჩვენი მისამართით. არც უკითხავს, რა ხდება ჩვენს თავს. არადა, მისი კონსტიტუციური ვალდებულებაა, როგორც ქვეყნის მეორე პირის, ჩაერიოს ასეთ ვითარებაში და ახსნა-განმარტებები მოისმინოს მხარეებისგან. მით უმეტეს მაშინ, როდესაც არსებობს საფუძვლიანი ეჭვი, რომ ეს პროცესები ხელისუფლების მხრიდან არის წარმართული. ამ ვითარებაში, მისი პასუხისმგებლობა და ვალდებულება - როგორც მედიის თავისუფლების გარანტიების ერთ-ერთი მატარებელი პირისგან, არის გაცილებით მაღალი“, - განაცხადა გვარამიამ.
ამასთან, მისი თქმით, ასევე, უცნაურია ადამიანის უფლებათა დაცვის კომიტეტის მხრიდან სრული იგნორირება და უყურადღებობა.
„ასევე, ძალიან უცნაურია ადამიანის უფლებათა დაცვის კომიტეტის მხრიდან სრული იგნორირება და უყურადღებობა ჩვენთან დაკავშირებით. ჩვენ ვერ ვგრძნობთ, რომ ქვეყანაში არსებობს ხელისუფლება, რომელიც ჩვენი ხელისუფლებაც არის“, - დასძინა გვარამიამ.
