პრემიერ ირაკლი ღარიბაშვილის განცხადებით, უშუალოდ მთავრობა ვერ შექმნის სამუშაო ადგილებს, მაგრამ ამისთვის მთავრობამ უნდა უზრუნველყოს თავისუფალი გარემო ბიზნესისთვის. ამის შესახებ მან საგარეჯოში, ამომრჩეველთან შეხვედრაზე ისაუბრა. მისივე თქმით, დიდი დრო სჭირდება იმის აღდგენას, რაც 25 წლის განმავლობაში ფუჭდებოდა.
,,ის, რაც 25 წლის განმავლობაში გაფუჭდა, რომელი მთავრობა შეძლებს აღადგინოს ერთ ან ორ წელიწადში, ან თუნდაც ხუთ წელიწადში?! ამას სჭირდება დრო. პოლიტიკოსებს სჩვევიათ ტყუილი და ხშირად ისინი ჰპირდებიან მოსახლეობას საოცარ, აყვავებულ საქართველოს. ეს არ ხდება ასე. ერთ და ორ წელიწადში ასე არ მოხდება. ჩვენი დამფუძნებლის, ბატონ ბიძინა ივანიშვილის სიტყვებს მოვიშველიებ, რომ ქვეყანა ასე ერთ დღეში არ შენდება, მაგრამ მთავარია ის, რომ ჩვენ სწორი გზით მიგვყავს ქვეყანა. ეს არის სწორი გზა, რომელიც ჩვენს ქვეყანას აუცილებლად დააყენებს ფეხზე. ის, რაც 3 წლის განმავლობაში განვახორციელეთ, არის სახელმწიფოს საძირკვლის, ფუნდამენტის გაძლიერება, რასაც უნდა დაეფუძნოს და აშენდეს თანამედროვე ქართული, ძლიერი სახელმწიფო, განათლებული, ჯანმრთელი თაობით, ძლიერი ქართული წარმოებით", - განაცხადა ღარიბაშვილმა.
მისივე თქმით, გასულ წელს ეკონომიკა გაიზარდა 4,8%-ით, უმუშევრობის დონე შემცირდა 2,6%-ით, თუმცა ეს არ არის საკმარისი.
მან ასევე ისაუბრა მთის კანონთან დაკავშირებითაც.
,,შემოვიღეთ მთის კანონი იმისთვის, რომ დავამაგროთ მთა და გავაძლიეროთ. შემოვიღეთ სპეციალური შეღავათიანი პირობები. დღეს მთაში, ბიზნესის კეთება, სასტუმროს თუ საწარმოს გახსნა, არის ნულოვანი დაბეგვრით. ჩვენ მთაში მეტი პენსიები დავნიშნეთ, უფრო მაღალი ხელფასები მივეცით ექიმებს და პედაგოგებს და მთელი საქართველოს მასშტაბით 82 ახალი ამბულატორია ავაშენეთ. ზოგიერთ სოფელში საერთოდ არ იყო ექიმი, არც ამბულატორია, ასეთ სოფლებში ჩავდგით ახალი, თანამედროვე ტიპის ამბულატორიები", - აღნიშნა პრემიერმა.
