პრემიერ-მინისტრის ირაკლი ღარიბაშვილის ინფორმაციით, დაპირება - იაფი ფინანსების უზრუნველყოფასთან დაკავშირებით, შესრულებულია. როგორც მან საგარეჯოში, ამომრჩეველთან შეხვედრაზე განაცხადა, ბიზნესმენი, ფერმერი, გლეხი სესხში იხდის 1 ან 2 პროცენტს, როცა ევროპაში არის 3-4 პროცენტიანი სესხები.
,,გვაქვს უნიკალური პროგრამა "აწარმოე საქართველოში". რა შეიძლება მთავრობამ გააკეთოს ბიზნესისთვის, ჩვენ ბიზნესს ვუფინანსებთ სესხს, ანუ ვასუბსიდირებთ. 10%-ს ვუფარავთ ბანკებში. გარდა ამისა, ჩვენ ვაძლევთ აბსოლუტურად უფასოდ მიწას ქარხნებს, რომლებიც იყო წლების განმავლობაში დაკეტილი. ასევე ვაძლევთ გარანტიას, რომ აიღონ სესხი ბანკებიდან. მეტი რა შეიძლება გააკეთოს მთავრობამ?! ბიზნესმენი, ფერმერი, გლეხი შეიძლება იხდიდეს მხოლოდ 1 ან 2 პროცენტს. იქ არის 3-4 პროცენტიანი სესხები. ჩვენი დაპირება რაც იყო, რომ იაფი ფინანსების უზრუნველყოფას მოვახდენდით, ეს არის შესრულებული. მარტო 100 საწარმო, ინდუსტრიის მიმართულებით დაფინანსდა ახალი პროგრამის "აწარმოე საქართველოში" ფარგლებში", - განაცხადა ღარიბაშვილმა და დასძინა რომ გაიზარდა ასევე პედაგოგებისა და ექიმების ხელფასებიც.
