პრემიერი ირაკლი ღარიბაშვილი დღეს საგარეჯოს ესტუმრა და მოსახლეობას შუალედურ არჩევნებში "ქართული ოცნების" კანდიდატის თამარ ხიდაშელის მხარდაჭერისკენ მოუწოდა.
პრემიერმა მოსახლეობასთან შეხვედრაზე განაცხადა, რომ "ქართული ოცნება" ხელსუფლებაში ყოფნის პერიოდში ბევრი რამ გაკეთდა, თუმცა იყო შეცდომებიც.
"სამი წელი გავიდა ჩემო ძვირფასებო მას შემდეგ, რაც კოალიცია "ქართულმა ოცნებამ" და ბიძინა ივანიშვილმა ქართველ ხალხთან ერთად გაიმარჯვა. გაიმარჯვა დამსახურებულად, ღირსეულად, ისე, როგორც ქართველ ერს ეკადრება. ამ სამი წლის განმავლობაში ჩვენ ძალიან ბევრი საქმე გავაკეთეთ. ბუნებრივია იყო შეცდომებიც, იყო ხარვეზებიც. ჩვენს ქვეყანაში რჩება ძალიან ბევრი პრობლემა, რომელიც ჯერ კიდევ გადაუჭრელია. მე პირადად, კოალიციას, გვაქვს აბსოლუტურად გააზრებული, რომ ამ პრობლემებს სჭირდება თანმიმდევრული მიყოლა და გადაჭრა", - განაცხადა ღარიბაშვილმა.
მან აღნიშნა, რომ ერთ-ერთი მთავარი მიმართულება, რომელშიც მთავრობამ წარმატებას მიაღწია არის ჯანდაცვა და სადაზღვევო პროგრამა.
შუალედური საპარლამენტო არჩევნები საგარეჯოსა და მარტვილში 31 ოქტომბერს გაიმართება.
