315-ე მუხლით დაწყებულ გამოძიებასთნ დაკავშირებით კომენტარს აკეთებს პრემიერმინისტრი. ირაკლი ღარიბაშვილის განცხადებით, ხელისუფლება გადატრიალების უფლებას არავის მისცემს.
„ვინც სახელმწიფოზე აღმართავს მახვილს, იმავე მახვილით იქნება განადგურებული,“ - ამის შესახებ საქართველოს პრემიერმინისტრმა განაცხადა.
ირაკლი ღარიბაშვილის თქმით, ხელისუფლება არ დაუშვებს ქვეყანაში არავითარ დესტაბილიზაციას.
პრემიერ-მინისტრმა სამეგრელოში ბოლო დროს განვითარებულ მოვლენებზე ისაუბრა და სექსუალური ძალადობის ამსახველ კადრებს შეეხო. წამების ორგანიზებაში მთავრობის მეთაურმა მიხეილ სააკაშვილს დასდო ბრალი. ირაკლი ღარიბაშვილის განცხადებით, მსგავსი შემთხვევები სამართალდამცველებმა მისი შინაგან საქმეთა მინსიტრობის დროს გახსნეს.
"არსახსენებლებს" ვეძახი წინა მთავრობის წარმომადგენლებს და სააკაშვილს, რომელიც არის სახე იმ ნიღბიანი ჯალათის, რომელიც ადამიანებს აუპატიურებდა. პირდაპირ ხდება მოწოდება, რომ ეს ხელისუფლება უნდა დაამხონ, ასე უნდა გავაკეთოთ და ისე უნდა გავაკეთოთო. მე მათ ვპირდები და გპირდებით თქვენ, რომ ჩვენი ხელისუფლება არ დაუშვებს არავითარ დესტაბილიზაციას.
"ჩვენ ვართ დღეს იმაზე უფრო მეტად ძლიერი, ვიდრე ვიყავით 3 წლის წინ. ვინც სახელმწიფოზე აღმართავს მახვილს, იმავე მახვილით იქნება განადგურებული. ჩვენ მათ, ვინც ხალხს დაურღვევს მშვიდობას და სტაბილურობას, რა თქმა უნდა, გავუშვებთ პოლიტიკურ მოუსავლეთში. ამ ადამიანების ადგილი პოლიტიკაში აღარ იქნება," - აცხადებს ირაკლი ღარიბაშვილი.
