ფრაქცია „ქართული ოცნების“ თავმჯდომარე გია ვოლსკი ინტერესდება, ტელეკომპანია „რუსთავი 2“-ის მფლობელები სად არიან და წინა პლანზე, „ადმინისტრაციის ხელმძღვანელი“ ნიკა გვარამია რატომ არის.
როგორც ჟურნალისტებს ვოლსკიმ განუცხადა, პირადად მას რაიმე საწინააღმდეგო არც გვარამიასი აქვს და არც „რუსთავი 2“-თან ურთიერთობაში გააჩნია რაიმე ხინჯი.
„აქ ერთი მთავარი საკითხია - არის თუ არა ეს პროცესი პოლიტიკურად მიზანშეწონილი და ეძლევა თუ არა „რუსთავი 2“-ს როგორც „ნაციონალური მოძრაობის“ ნაწილს საშუალება იმისა, რომ დაძაბულობის ესკალაცია მოახდინოს?! - რა საკვირველია, ამის საშუალება ეძლევა და აქედან გამომდინარე, ამის პოლიტიკური მიზანშეწონილობა არ არსებობს. მაშ, რა ხდება? - ხდება ის, რომ არ შეიძლება, პროცესი მხოლოდ პოლიტიკური მიზანშეწონილობით იზომებოდეს“, - აცხადებს ვოლსკი.
კანონმდებელი ქიბარ ხალვაშსაც ეხმაურება და ამბობს, რომ საქმის სამართლებრივი ნაწილი არსებობს.
„რატომღაც ყველას გვიკვირს, რომ თურმე, „ნაციონალურმა მოძრაობამ“ ვიღაც ბიზნესმენს ქონება წაართვა. თურმე, ეს არის გასაკვირი, გასაგიჟებელი ამბავი და ამას მუქარა სჭირდება. ვინ გამორიცხავს იმას, რომ მაშინ მეწარმეს, ბიზნესმენს ქონება წაართვეს? - ტელეკომპანია „იბერიამ“ წართმეული ქონების დაბრუნება ახლა მოახერხა და ტელე-მაუწყებლობა აღადგინა. მათი ოფისი სად არის, არ ვიცი, მაგრამ თუკი მათ მაუწყებლობის აღდგენა მოახერხეს, იქნებ, მოჰყვნენ ქონება როგორ დაიბრუნეს?! ქიბარ ხალვაშს ქონება როგორ დაუწვეს, მახსოვს, მაგრამ მისთვის კითხვა არავის დაუსვამს, როგორ და რა გარემობებში აღმოჩნდა ის საზღვარგარეთ?! როცა სასამართლოს გადაწყვეტილება ჯერ არ მიუღია, წინასწარ ასეთი ტრაგიკული ფორმით აჟიოტაჟის ატეხვა და ხალხისადმი მოწოდება, რომ სასამართლოზე ზეწოლა მოახდინონ, ესეც დაძაბულობისა და ესკალაციის წინაპირობას ქმნის“, - განაცხადა ვოლსკიმ.
