საქართველოს პარლამენტის თავმჯდომარე დავით უსუფაშვილი საქართველოს საკონსტიტუციო სასამართლოს თავმჯდომარეს ასევე წერილობითი ფორმით პასუხობს. გიორგი პაპუაშვილის მიერ პრეზიდენტის, პრემიერისა და პარლამენტის თავმჯდომარის მიმართ გავრცელებულ მიმართვაზე საპასუხოდ დავით უსუფაშვილი მას შეხვედრას და პრობლემებზე მსჯელობას სთავაზობს.
,,ბატონო გიორგი,
გავეცანი თქვენს წერილს, რომელშიც მიუთითებთ საკონსტიტუციო სასამართლოს ნორმალური ფუნქციონირებისთვის ხელისშემშლელ გარემოებებზე და ითხოვთ მათ აღსაკვეთად სათანადო ზომების მიღებას.
საკითხის მნიშვნელობიდან გამომდინარე, გთავაზობთ, დავგეგმოთ შეხვედრა და საკონსტიტუციო სასამართლოს სხვა წევრებთან ერთად განვიხილოთ როგორც პრობლემები, ისე მათი მოგვარების შესაძლო გზები.
ეფექტური, დამოუკიდებელი და ობიექტური საკონსტიტუციო მართლმსაჯულების შეუფერხებელი განხორციელება დემოკრატიული სახელმწიფოს ერთ-ერთი უმთავრესი პრიორიტეტია, რომლის უზრუნველსაყოფადაც ყველა შესაძლო ზომას უნდა მივმართოთ”, - ნათქვამია წერილში.
საკონსტიტუციო სასამართლოს თავმჯდომარემ პრეზიდენტს, პრემიერ-მინისტრს და პარლამენტის თავმჯდომარეს დღეს წერილობით მიმართა და მოუწოდა, კანონის ფარგლებში გამოიყენონ უფლებამოსილება, მიიღონ სათანადო ზომები საკონსტიტუციო სასამართლოსა და ინდივიდუალურად მოსამართლეების მიმართ განხორციელებულ უკანონო ქმედებებზე შესაბამისი სამართლებრივი რეაგირებისა და საკონსტიტუციო სასამართლოს შემდგომი საქმიანობის ხელშემშლელი ფაქტორების დროულად აღსაკვეთად.
